वाराणसीहून भक्तांचे आगमन; जय हनुमान नाच मंडळाचे जाखडी नृत्य आणि सांस्कृतिक कार्यक्रमांची रेलचेल
चिपळूण:
Chiplun Ganga Aarti Navratri उपक्रमांतर्गत चिपळूण येथील श्री भैरी भवानी नवरात्रोत्सवाच्या वतीने दुष्काळ निवारणार्थ एक विशेष धार्मिक व सांस्कृतिक उपक्रम हाती घेण्यात आला आहे. वाशिष्ठी नदीच्या तीरावर १७ ऑक्टोबर रोजी सायंकाळी ७ वाजता इंदिरा गांधी सांस्कृतिक केंद्रासमोरील पटांगणात भव्य ‘गंगा आरती’चे आयोजन करण्यात आले आहे. या दिव्य आरतीसाठी विशेषत्वाने वाराणसी (काशी) येथून भक्तगण व पुरोहित चिपळूणात दाखल होणार आहेत.
दुष्काळ निवारण आणि सामूहिक ताकद निर्माण करण्याचा उद्देश
वाराणसी, हरिद्वार आणि ऋषिकेश येथे होणाऱ्या प्रसिद्ध गंगा आरतीमध्ये देश-विदेशातील हजारो नागरिक एकत्र येत असतात. याच धर्तीवर आणि या पार्श्वभूमीवर चिपळूणात आयोजित करण्यात आलेल्या या गंगा आरतीला विशेष महत्त्व प्राप्त झाले आहे. दुष्काळाशी लढण्यासाठी समाजात सामूहिक ताकद निर्माण व्हावी आणि आध्यात्मिक ऊर्जेतून दुष्काळ निवारण व्हावे, या मुख्य उद्देशाने ही गंगा आरती आयोजित करण्यात येत असल्याचे आयोजकांनी सांगितले आहे.
नवरात्रोत्सवात विविध धार्मिक व सांस्कृतिक कार्यक्रमांचे आयोजन
श्री भैरी भवानी नवरात्रोत्सवानिमित्त १७ ऑक्टोबरच्या गंगा आरतीसोबतच १६ ऑक्टोबर ते २१ ऑक्टोबर दरम्यान विविध कार्यक्रमांचे आयोजन करण्यात आले आहे:
१६ ऑक्टोबर: जय हनुमान नाच मंडळ (कुंभारवाडी टेरव) यांचे पारंपरिक ‘जाखडी नृत्य’.
१७ ऑक्टोबर: सायंकाळी ७ वाजता वाशिष्ठीच्या तीरावर ‘गंगा आरती’.
१८ ऑक्टोबर: देवीचा गोंधळ, भोंडला, रांगोळी स्पर्धा तसेच दांडिया.
१९ ऑक्टोबर: उत्साहपूर्ण रास दांडिया.
२० ऑक्टोबर: दसरा उत्सव व दांडिया.
२१ ऑक्टोबर: महाप्रसाद आणि मूर्तीचे विसर्जन सोहळा.
