जंतर-मंतरवरील आंदोलकांना कवितेतून इशारा; मुख्य निवडणूक आयुक्त ज्ञानेश कुमार यांचे समर्थन करत विरोधकांना दिले पुरावे सादर करण्याचे आव्हान
Ramdas Athawale On Rahul Gandhi प्रकरणातून केंद्रीय सामाजिक न्यायमंत्री आणि आरपीआयचे (RPI) अध्यक्ष रामदास आठवले यांनी काँग्रेस नेते राहुल गांधींवर आपल्या खास खुसखुशीत आणि कवितेच्या शैलीत जोरदार निशाणा साधला आहे. "२०२९ ला मी पंतप्रधान नरेंद्र मोदींसोबत क्रिकेट खेळणार आहे आणि राहुल गांधींची विकेट घेणार आहे," असा टोला लगावत आठवले यांनी राजकीय वर्तुळात चांगलीच चर्चा रंगवून आणली आहे. धाराशिव (उस्मानाबाद) येथे पत्रकारांशी बोलताना त्यांनी ही मिश्किल टिप्पणी केली.
‘नेहरूंचा विक्रम मोडल्याचा राहुल गांधींच्या मनात राग’
आपल्या हटके शैलीतील कवितेसाठी प्रसिद्ध असणाऱ्या रामदास आठवले यांनी आरोप केला की, पंतप्रधान नरेंद्र मोदी यांनी सलग तीनदा पंतप्रधानपद भूषवून पंडित जवाहरलाल नेहरू यांच्या विक्रमाशी बरोबरी केली आहे आणि त्यांचा विक्रम मोडला आहे, याचाच राग राहुल गांधी यांच्या मनात साचलेला आहे. याच रागापोटी आणि नैराश्यातून राहुल गांधी आणि विरोधक विविध आंदोलने करत असल्याचा दावा त्यांनी केला.
‘जो जायेगा जंतर-मंतर, उसको जाना होगा अंदर’
नवी दिल्लीतील जंतर-मंतरवर प्रदर्शन आणि आंदोलन करणाऱ्यांना आठवले यांनी आपल्या कवितेतून थेट इशारा दिला. "जो जायेगा जंतर-मंतर, उसको जाना होगा अंदर," असे म्हणत त्यांनी आंदोलकांवर झालेल्या अटकेच्या कारवाईचे पूर्ण समर्थन केले. "काँग्रेसच्या सत्ताकाळात आम्हीदेखील अनेक आंदोलने केली होती आणि त्यावेळी आम्हालाही अटक करण्यात आली होती. देशात कायदा आणि सुव्यवस्था अबाधित ठेवण्यासाठी प्रशासनाला अशा प्रकारची कारवाई करावीच लागते," असे त्यांनी स्पष्ट केले.
मतचोरीच्या आरोपांवर मुख्य निवडणूक आयुक्तांची पाठराखण
मतचोरीच्या मुद्द्यावरून मुख्य निवडणूक आयुक्त ज्ञानेश कुमार यांच्यावर टीका करणाऱ्या विरोधकांना आठवले यांनी उघडे पाडले. "जर खरोखरच मतचोरी झाली असेल, तर विरोधकांनी त्याबाबतचे ठोस पुरावे सादर करावेत," असे थेट आव्हान त्यांनी दिले. नियमांनुसार काही बोगस किंवा दुबार मतदारांची नावे वगळण्यात आली असतील, तर त्यावरून थेट निवडणूक आयुक्तांना बडतर्फ करण्याची मागणी करणे चुकीचे आहे. केवळ विरोधक आरोप करत आहेत म्हणून देश आणि संविधान धोक्यात आले, असा निष्कर्ष काढता येणार नाही, असेही ते म्हणाले.
अभिजीत दीपके यांना आरपीआयमध्ये येण्याची ऑफर
या दरम्यान कॉकरोच जनता पार्टीचे (CJP) संस्थापक अध्यक्ष अभिजीत दीपके यांचे आठवले यांनी कौतुक केले. दीपके हे डॉ. बाबासाहेब आंबेडकरांच्या विचारांचा प्रभाव स्वीकारून तरुणांमध्ये चांगली जागृती करत असल्याचे सांगत, त्यांनी दीपके यांना आपल्या रिपब्लिकन पार्टी ऑफ इंडिया (RPI) पक्षात अधिकृतपणे प्रवेश करण्याची जाहीर ऑफर दिली.
