चवंडेवठार येथील तरुणाचा परकार हॉस्पिटलमध्ये उपचारापूर्वीच मृत्यू; परिसरात शोककळा
रत्नागिरी:
Ratnagiri Cricket Player Sudden Death संदर्भात एक अत्यंत दुर्दैवी बातमी समोर आली आहे. रत्नागिरी तालुक्यातील चवंडेवठार येथील लक्ष्मी चौकात मित्रांसोबत अंडरआर्म क्रिकेट खेळताना एका ३५ वर्षीय तरुणाचा अचानक चक्कर येऊन खाली कोसळल्याने मृत्यू झाला. या घटनेमुळे परिसरात हळहळ व्यक्त केली जात आहे. स्मित नरेंद्र चवंडे (वय ३५, रा. चवंडेवठार, रत्नागिरी) असे मृत तरुणाचे नाव आहे.
सामना सुरू असताना अचानक आला झटका
मिळालेल्या प्राथमिक माहितीनुसार, स्मित चवंडे हे रविवारी सकाळी आपल्या स्थानिक मित्रांसोबत चवंडेवठार येथील लक्ष्मी चौकात आवडीने अंडरआर्म क्रिकेटचा सामना खेळत होते. खेळ सुरू असतानाच अचानक त्यांना चक्कर आली आणि ते बेशुद्ध होऊन थेट जमिनीवर कोसळले.
हा प्रकार घडताच सोबत खेळणाऱ्या मित्रांची मोठी धावपळ उडाली. यातील युगेश सावंत यांनी तातडीने स्मित यांचे भाऊ सुशांत चवंडे यांना फोनवरून या घटनेची कल्पना दिली.
रुग्णालयात दाखल करण्यापूर्वीच प्राणज्योत मालवली
घटनेची माहिती मिळताच कुटुंबीयांनी घटनास्थळी धाव घेत स्मित यांना उपचारासाठी तातडीने सकाळी ९:१५ वाजण्याच्या सुमारास रत्नागिरीतील परकार हॉस्पिटल येथे हलवले. मात्र, तेथील वैद्यकीय अधिकाऱ्यांनी त्यांची तपासणी करून उपचारापूर्वीच त्यांना मृत घोषित केले.
अचानक घडलेल्या या दुर्दैवी घटनेमुळे चवंडे कुटुंबीयांवर दुःखाचा डोंगर कोसळला असून चवंडेवठार परिसरात सर्वत्र शोककळा पसरली आहे. या प्रकरणी रत्नागिरी पोलीस ठाण्यात नोंद करण्यात आली असून पोलीस पुढील कायदेशीर कारवाई करत आहेत.
