५०५३ पानांचे आरोपपत्र दाखल; केतन अग्रवाल हत्याप्रकरणात सिया आणि तिचा बॉयफ्रेंड अटकेत
पुणे:
Pune Lohagad Murder Case संदर्भात समोर आलेल्या अतिशय खळबळजनक आणि महत्त्वाच्या अपडेटनुसार, पुण्यातील बहुचर्चित लोहगड हत्याप्रकरणात (आधी अपघात आणि नंतर खून) ज्येष्ठ विधिज्ञ उज्ज्वल निकम (Ujjwal Nikam) यांची विशेष सरकारी वकील (Special Public Prosecutor) म्हणून नियुक्ती करण्यात आली आहे. केतन अग्रवाल यांच्या हत्याप्रकरणी न्याय मिळण्यासाठी आणि खटल्याची बाजू प्रभावीपणे मांडण्यासाठी ही नियुक्ती करण्यात आली असून, यामुळे या खटल्याला आता मोठे कायदेशीर महत्त्व प्राप्त झाले आहे.
५०५३ पानांचे आरोपपत्र दाखल; डिजिटल सर्चचाही समावेश
या खळबळजनक प्रकरणात पोलिसांनी मृत केतनची होणारी पत्नी ‘सिया’ आणि तिच्या बॉयफ्रेंडला यापूर्वीच अटक केली आहे. तसेच या प्रकरणात पोलिसांनी तब्बल ५ हजार ५३ पानांचे (5,053 Pages Chargesheet) सविस्तर आरोपपत्र न्यायालयात दाखल केले आहे.
या चार्जशीटमध्ये पोलिसांनी तपासातील सर्व तांत्रिक व भौतिक पुरावे जोडले असून, घटनेच्या आधी आणि नंतर आरोपींनी केलेल्या ‘डिजिटल सर्च’ची (Digital Search) सविस्तर माहितीही यामध्ये नमूद करण्यात आली आहे. या गंभीर गुन्ह्याच्या तपासाने अनेक थक्क करणाऱ्या गोष्टी उघड केल्या आहेत.
मुख्यमंत्री देवेंद्र फडणवीस यांचे मानले आभार
ज्येष्ठ विधिज्ञ उज्ज्वल निकम यांची विशेष सरकारी वकील म्हणून नेमणूक करण्यात यावी, अशी आग्रही मागणी मृत केतन अग्रवाल यांच्या वडिलांनी केली होती. त्यानुसार राज्य शासनाने हा निर्णय घेतल्यामुळे अग्रवाल कुटुंबीयांनी समाधान व्यक्त केले आहे. आपल्या मुलाला लवकरात लवकर न्याय मिळेल, अशी तीव्र अपेक्षा व्यक्त करत कुटुंबीयांनी मुख्यमंत्री देवेंद्र फडणवीस यांचे मनापासून आभार मानले आहेत. उज्ज्वल निकम यांच्यासारख्या कायदेशीर क्षेत्रातील दिग्गज वकिलाची एन्ट्री झाल्यामुळे या खटल्याच्या सुनावणीकडे आता संपूर्ण राज्याचे लक्ष लागले आहे.
धक्कादायक घटनाक्रम: हत्येचा असा रचला होता कट
पोलीस तपासात आणि आरोपपत्रात समोर आलेल्या माहितीनुसार, लोहगड हत्याप्रकरणाचा घटनाक्रम अत्यंत सुनियोजित आणि थरारक होता:
२५ मे: सिया आणि तिच्या प्रियकराने केतन अग्रवालला ‘एलिमिनेट’ (हत्या) करण्याचा पक्का कट रचला.
३१ मे: सिया आणि तिचा बॉयफ्रेंड पहिल्यांदा लोहगड येथे गेले. तिथे सियाने स्वतः रेकी करून हत्येसाठी अगदी योग्य आणि निर्जन जागेची (Spot) निवड केली.
६ जूनचा ‘बाली प्लॅन’ रद्द करण्याचा बनाव: ६ जून रोजी केतन आणि सिया बाली देशात फिरायला जाणार होते. मात्र, तिथे एकत्र राहावे लागेल म्हणून ४ जूनलाच हत्येचा प्लॅन आखण्यात आला होता. घरच्यांनी ऐनवेळी विरोध केल्याने तो प्लॅन रद्द झाला. त्यानंतर मुंबई विमानतळावर (Airport) जाताना एका फूड मॉलवर गाडी थांबवली असता, सियाने चलाखीने केतनचा पासपोर्ट चोरून कचऱ्याच्या डब्यात फेकून दिला, ज्यामुळे त्यांचा बालीचा दौरा पूर्णपणे रद्द झाला.
१४ जून आणि १९ जूनचा बर्थडे प्लॅन: १९ जून रोजी सियाच्या वाढदिवसानिमित्त महाबळेश्वर येथे एक रिसॉर्ट बुक करण्यात आले होते. त्यापूर्वी १४ जून रोजीच लोहगडावर नेऊन केतनची हत्या करण्याचा प्रयत्न करण्यात आला होता, परंतु तो प्लॅन त्या वेळी यशस्वी होऊ शकला नाही.
पोलिसांकडून या प्रकरणाचा अत्यंत सूक्ष्म तपास सुरू असून, उज्ज्वल निकम यांच्या नियुक्तीनंतर या खटल्याच्या सुनावणीला आता वेग येणार आहे.
