कोकणासह नाशिक घाटमाथ्यावर पावसाची शक्यता; मुंबई-ठाण्यात उष्णता आणि उकाडा वाढणार
मुंबई:
महाराष्ट्रात गेल्या काही दिवसांपासून हवामानात सातत्याने मोठे बदल घडताना दिसत आहेत. या पार्श्वभूमीवर हवामान विभागाने राज्यातील हवामानाबाबत नवा इशारा जारी केला आहे. राज्यात एकाच वेळी दोन प्रकारचे हवामान अनुभवायला मिळण्याची शक्यता असून, काही भागात हलक्या ते मध्यम स्वरूपाचा पाऊस हजेरी लावेल, तर उर्वरित बहुतांश जिल्ह्यांमध्ये तापमानात मोठी वाढ होऊन उष्णतेचा पारा वाढणार आहे.
ऑक्टोबर महिन्याच्या उत्तरार्धातच राज्यात ‘ऑक्टोबर हिट’चा प्रचंड प्रभाव जाणवू लागला असून पुढील काही दिवसांत उष्णता आणि उकाडा अधिक वाढण्याचा अंदाज वर्तवण्यात आला आहे. किनारपट्टीच्या भागांमध्ये हवामान कोरडे राहून तापमानात वाढ होईल, तर काही जिल्ह्यांत स्थानिक वातावरणातील बदलांमुळे पावसाच्या सरी कोसळतील.
हवामान विभागाने दिलेल्या अंदाजानुसार, राज्यातील विविध भागांतील स्थिती खालीलप्रमाणे राहील:
*कोकण विभाग: *मुंबई, ठाणे आणि पालघर या जिल्ह्यांमध्ये हवामान मुख्यत्वे कोरडे राहील आणि तापमान वाढेल. मात्र, रत्नागिरी, सिंधुदुर्ग आणि रायगड या जिल्ह्यांमध्ये हलक्या स्वरूपाचा पाऊस पडण्याची शक्यता आहे.
उत्तर आणि मध्य महाराष्ट्र: नाशिकचा घाटमाथा आणि अहिल्यानगर (अहमदनगर) परिसरात मेघगर्जनेसह पाऊस होण्याचा इशारा देण्यात आला आहे. तर पुणे, सांगली आणि सोलापूर जिल्ह्यांत हवामान कोरडे राहण्याचे संकेत आहेत.
*मराठवाडा: *छत्रपती संभाजीनगर जिल्ह्यात हलका पाऊस होण्याची शक्यता आहे. दुसरीकडे परभणी, हिंगोली, नांदेड, लातूर, जालना आणि धाराशिव या जिल्ह्यांमध्ये हवामान मुख्यत्वे कोरडेच राहील.
अचानक बदलणाऱ्या या हवामानामुळे आणि उष्णतेच्या वाढत्या प्रमाणामुळे नागरिकांनी आरोग्याची काळजी घेण्याचे आवाहन प्रशासनाकडून करण्यात आले आहे. वाढत्या उकाड्यामुळे शेतीकामांवर आणि दैनंदिन जनजीवनावरही परिणाम दिसून येत आहे.
