हरमनप्रीत कौरची वादळी नाबाद ९१ धावांची खेळी; मायदेशातील टी-२० क्रिकेटमधील सर्वात मोठ्या विजयाची नोंद
रायपूर:
रायपूर येथील शहीद वीर नारायण सिंह आंतरराष्ट्रीय स्टेडियमवर खेळल्या गेलेल्या तिसऱ्या टी-२० आंतरराष्ट्रीय सामन्यात भारतीय महिला संघाने झिम्बाब्वेचा तब्बल ९२ धावांनी पराभव करत धमाकेदार विजय मिळवला. या विजयासह भारतीय महिला संघाने मायदेशात टी-२० आंतरराष्ट्रीय क्रिकेटमध्ये धावांच्या फरकाने सर्वात मोठा विजय नोंदवण्याचा नवा आणि ऐतिहासिक विक्रम आपल्या नावावर केला आहे.
मायदेशातील विजयाचे नवे विक्रम
भारतीय महिला संघाने यापूर्वीही मायदेशात अनेक सामने जिंकले होते, मात्र झिम्बाब्वेविरुद्धचा ९२ धावांचा विजय हा आतापर्यंतचा सर्वात मोठा ठरला आहे.
२०१६ मध्ये बंगळुरू येथे बांगलादेशविरुद्ध मिळालेला ७२ धावांचा विजय.
२०२४ मध्ये मुंबईत वेस्ट इंडिजविरुद्ध ६० धावांचा विजय.
२०१९ मध्ये सुरतमध्ये दक्षिण आफ्रिकेविरुद्ध ५१ धावांचा विजय.
या सर्व जुन्या विक्रमांना मागे टाकत टीम इंडियाने रायपूरमध्ये नवा उच्चांक प्रस्थापित केला आहे.
हरमनप्रीत कौर आणि शेफाली वर्माची आक्रमक फलंदाजी
या सामन्यात भारतीय संघाने नाणेफेक जिंकून प्रथम फलंदाजी करण्याचा निर्णय घेतला. टीम इंडियाने निर्धारित २० षटकांत ७ गडी गमावून तब्बल २१६ धावांचा डोंगर उभा केला.
शेफाली वर्मा आणि अनुष्का शर्मा यांनी पहिल्या विकेटसाठी ५४ धावांची भागीदारी केली. अनुष्का २८ धावा काढून बाद झाली, तर निक्की प्रसादला ९ धावा करता आल्या.
यानंतर कर्णधार हरमनप्रीत कौरने मोर्चा सांभाळत झिम्बाब्वेच्या गोलंदाजांची चांगलीच धुलाई केली. तिने अवघ्या ४१ चेंडूंत १० चौकार आणि ५ गगनचुंबी षटकारांच्या मदतीने नाबाद ९१ धावांची वादळी खेळी केली.
शेफाली वर्मानेही तिला उत्तम साथ देत ६९ धावांची आक्रमक खेळी साकारली. या दोघांच्या जोरावर भारताने २१६ धावांपर्यंत मजल मारली.
झिम्बाब्वेची फलंदाजी ढेपाळली
२१७ धावांच्या मोठ्या लक्ष्याचा पाठलाग करण्यासाठी उतरलेल्या झिम्बाब्वेची सुरुवात अत्यंत खराब झाली. पहिल्याच चेंडूवर सलामीवीर केलिस न्धलोवू खाते न उघडता बाद झाली. त्यानंतर मॉडेस्टर मुपाचिकवालाही केवळ १ धाव करून बाद झाली. शार्न मायर्स आणि बिझा यांनी तिसऱ्या विकेटसाठी ८२ धावांची भागीदारी करून डाव सावरण्याचा प्रयत्न केला, परंतु वाढत्या धावगतीचे ओझे झिम्बाब्वेच्या फलंदाजांना पेलता आले नाही.
निर्धारित २० षटकांत झिम्बाब्वेच्या संघाला ७ गडी गमावून केवळ १२४ धावांपर्यंतच मजल मारता आली. भारताकडून उत्कृष्ट गोलंदाजी करताना नंदिनी शर्माने सर्वाधिक ३ विकेट्स पटकावल्या आणि भारतीय महिला संघाने ९२ धावांनी सामना जिंकून मालिका गाजवली.
