सलग पाचव्या वर्षी उपक्रम; भगवती, महालक्ष्मी, जुगाई, आदिष्टी व आडीवरे महाकालीचे घडवले दर्शन
रत्नागिरी : रत्नागिरी नगरपरिषदेच्या प्रभाग क्रमांक ५ च्या लोकप्रिय नगरसेविका सौ. पूजा दीपक पवार यांनी सालाबादप्रमाणे यंदाही नवरात्रोत्सवाच्या निमित्ताने प्रभागातील महिला भाविकांसाठी मोफत देवी दर्शन सहलीचे शानदार आयोजन केले होते. १२ आणि १३ ऑक्टोबर रोजी आयोजित करण्यात आलेल्या या दर्शन सोहळ्याला प्रभागातील महिलांचा प्रचंड आणि उत्स्फूर्त प्रतिसाद लाभला असून, या उपक्रमाबद्दल महिला वर्गातून पूजा वहिनींचे भरभरून कौतुक होत आहे.
महिलांची इच्छा ओळखून सलग ५ वर्षे उपक्रम :
दरवर्षी नवरात्रोत्सवात प्रभाग क्रमांक पाचमधील महिला भाविकांसाठी ही देवी दर्शन सहल विशेष आकर्षणाचा केंद्रबिंदू ठरते. अनेकदा घरगुती जबाबदाऱ्या, आर्थिक अडचणी किंवा स्वतःच्या वाहनाची सोय नसल्याने अनेक महिलांना इच्छा असूनही देवीच्या दर्शनासाठी बाहेर पडता येत नाही. महिलांची हीच अडचण ओळखून नगरसेविका सौ. पूजा वहिनी गेल्या पाच वर्षांपासून सातत्याने या मोफत सहलीचे आयोजन करत आहेत. या उपक्रमामुळे महिलांना केवळ शक्तीपीठांचे दर्शनच घडत नाही, तर प्रभागातील सर्व महिला एकत्र येऊन त्यांच्यात आपुलकी व स्नेहाचे नातेही दृढ होते.
ज्येष्ठ नेते बंड्या साळवींच्या हस्ते शुभारंभ :
रत्नागिरी जिल्ह्याचे पालकमंत्री ना. उदय सामंत, राजापूर-लांजा विधानसभा मतदारसंघाचे आमदार किरण सामंत आणि नगराध्यक्षा सौ. शिल्पाताई सुर्वे यांच्या मार्गदर्शनाखाली ही सहल पार पडली. शिवसेनेचे ज्येष्ठ नेते तथा नगरसेवक बंड्या साळवी यांच्या हस्ते श्रीफळ वाढवून या अभिनव उपक्रमाचा शुभारंभ करण्यात आला. दोन्ही दिवशी सकाळी १० वाजता बाळासाहेब ठाकरे ॲक्टिव्हिटी सेंटर, साळवी स्टॉप येथून भाविक महिलांसाठी आरामदायी वातानुकूलित (AC) बसेस सोडण्यात आल्या होत्या.
प्रसिद्ध शक्तीपीठांचे भावपूर्ण दर्शन व उत्तम नियोजन :
या सहलीदरम्यान महिला भाविकांना रत्नागिरीची ग्रामदेवता श्री भैरी-भगवती, महालक्ष्मी, जुगाई, आदिष्टी आणि आडीवरेची प्रसिद्ध महाकाली या जागृत मंदिरांचे दर्शन घडवून आणण्यात आले. महिलांचा हा प्रवास अत्यंत सुखकर आणि आनंददायी व्हावा यासाठी पूजा वहिनी स्वतः प्रत्येक गोष्टीवर बारकाईने लक्ष ठेवून होत्या. सर्व महिलांसाठी सुरक्षित वातानुकूलित प्रवास, चहा-नाश्त्याची दर्जेदार सोय आणि देवदर्शनाची चोख व्यवस्था करण्यात आली होती.
प्रभागातील महिलांकडून कौतुकाचा वर्षाव :
घरबसल्या इतक्या आदरपूर्वक आणि नियोजनबद्ध पद्धतीने सर्व प्रमुख देवींचे दर्शन घडवून आणल्याबद्दल प्रभाग क्रमांक ५ मधील महिलांनी मनापासून आनंद व्यक्त केला असून, नगरसेविका सौ. पूजा दीपक पवार यांचे कृतज्ञतापूर्वक आभार मानले आहेत.
