"देशाबाहेर काय सुरू आहे कल्पना आहे का?"; जंतरमंतर आंदोलन प्रकरणी CJP च्या नेत्यांना न्यायालयाचे खडेबोल
नवी दिल्ली:
निवडणूक आयुक्त ज्ञानेश कुमार यांच्या राजीनाम्याच्या मागणीसाठी आणि विविध मुद्द्यांवर आक्रमक झालेले ‘कॉकरोच जनता पार्टी’ (CJP) चे आंदोलन अडचणीत सापडले आहे. १० ऑक्टोबर रोजी ठरलेल्या आंदोलनापूर्वीच दिल्ली पोलिसांनी CJP चे संस्थापक अभिजीत दिपके यांच्यासह प्रमुख नेत्यांना ताब्यात घेतले होते. या आंदोलनादरम्यान सीजेपीचे प्रमुख नेते सौरव दास आणि आशुतोष रांका यांना जामिनाच्या अटींचे उल्लंघन केल्याप्रकरणी तुरुंगात जावे लागले. या प्रकरणी दिल्ली उच्च न्यायालयात पार पडलेल्या सुनावणीत न्यायालयाने पक्षाच्या नेत्यांना चांगलेच फटकारले आहे.
उच्च न्यायालयाचे कडक ताशेरे आणि उपस्थित केलेले प्रश्न
दिल्ली उच्च न्यायालयाचे न्यायमूर्ती सुब्रमण्यम प्रसाद यांच्या समोर या याचिकेची सुनावणी झाली. यावेळी न्यायालयाने CJP च्या नेत्यांच्या भूमिकेवर गंभीर सवाल उपस्थित केले:
"तुम्ही जेनझी (Gen-Z) नाही आहात": न्यायालयासमक्ष युक्तिवाद सुरू असताना, याचिकाकर्त्यांच्या वयावर आणि वर्तनावर भाष्य करताना न्यायालयाने स्पष्ट शब्दांत सुनावले की, "तुम्ही जेनझी नाही आहात."
बॉन्डचे उल्लंघन आणि कायदेशीर प्रक्रिया: नेत्यांनी जामीन मिळाल्यानंतर शांतता राखण्याचे लिखित बंधपत्र (बॉन्ड) दिले होते, मात्र त्याचे उघडपणे उल्लंघन करत त्यांनी नियमांना बगल दिली. दंडाधिकाऱ्यांच्या न्यायालयाचा पर्याय असताना थेट उच्च न्यायालयात धाव घेण्याच्या पद्धतीवरही न्यायालयाने प्रश्नचिन्ह उपस्थित केले.
देशाबाहेर काय सुरू आहे?: सुनावणीदरम्यान देशाबाहेर सुरू असलेल्या घडामोडींचा संदर्भ देत न्यायालयाने आंदोलनाच्या पद्धतीवर ताशेरे ओढले. कायदेशीर प्रक्रियेचे पालन न करता स्वतःच्या मर्जीने नियम मोडणे योग्य नाही, असे न्यायालयाने स्पष्ट केले. न्यायालयाच्या या कडक भूमिकेनंतर अखेर सीजेपीतर्फे त्यांची याचिका मागे घेण्यात आली.
नीट पेपरफुटी आंदोलनाचे यश आणि पोलिसांची कारवाई
यापूर्वी कॉकरोच जनता पार्टीने ‘नीट’ (NEET) परीक्षा पेपरफुटी विरोधात देशभरात अभूतपूर्व आणि आक्रमक आंदोलन पुकारले होते. त्या आंदोलनाला तरुणांचा प्रचंड प्रतिसाद लाभला होता, ज्याचा रेटा इतका वाढला की केंद्रीय शिक्षण मंत्री धर्मेंद्र प्रधान यांना आपल्या पदाचा राजीनामा द्यावा लागला होता. याच धर्तीवर निवडणूक आयुक्तांविरोधातही मोठे आंदोलन उभारण्याची तयारी CJP ने केली होती. मात्र, मुख्य आंदोलनापूर्वीच दिल्ली पोलिसांनी कडक पावले उचलत प्रमुख नेत्यांना ताब्यात घेतल्याने CJP चा हा ‘गेम’ उधळला गेला. सध्या या कायदेशीर संघर्षामुळे कॉकरोच जनता पार्टीचे आंदोलन बॅकफूटवर गेल्याचे चित्र आहे.
