जंतर मंतर आंदोलनाबाबत न्यायालयाला हमी; बाहेर पडताच ‘इन्किलाब जिंदाबाद’च्या घोषणा
नवी दिल्ली:
कॉकरोच जनता पक्षाचे (CJP) प्रमुख नेते सौरभ दास आणि आशुतोष रांका यांना दिल्लीतील एसईएम (SEM) न्यायालयाकडून दिलासा मिळाला असून दोघांनाही जामीन मंजूर करण्यात आला आहे. न्यायालयीन कोठडीतून मुक्ततेचे आदेश मिळताच दोघांची दिल्लीतील प्रसिद्ध तिहार तुरुंगातून सुटका करण्यात आली आहे.
सुटकेच्या वेळी सौरभ दास हे तुरुंग क्रमांक २ मध्ये, तर आशुतोष रांका हे तुरुंग क्रमांक ४ मध्ये होते. तुरुंगातून बाहेर पडल्यानंतर दोन्ही नेत्यांनी माध्यमांशी थेट संवाद साधणे टाळले असले, तरी गाडीत बसताना आशुतोष रांका यांनी ‘इन्किलाब जिंदाबाद’ अशी जोरदार घोषणा दिली.
जंतर मंतरवर आंदोलनाबाबत न्यायालयात प्रतिज्ञापत्र
एसईएम न्यायालयाने दोन्ही सीजेपी नेत्यांना एका विशेष प्रतिज्ञापत्रावर स्वाक्षरी करण्याचे आदेश दिल्यानंतर हा जामीन मंजूर करण्यात आला. न्यायालयाच्या आदेशानुसार दाखल केलेल्या या प्रतिज्ञापत्रात सौरव दास आणि आशुतोष रांका यांनी स्पष्ट म्हटले आहे:
"आम्ही शांतता, कायदा व सुव्यवस्था आणि सार्वजनिक शांतता राखण्याची आमची वचनबद्धता व आश्वासन पुन्हा एकदा व्यक्त करतो. जोपर्यंत कायद्यानुसार जंतर मंतरला आंदोलनाचे अधिकृत ठिकाण म्हणून पुन्हा अधिसूचित केले जात नाही, तोपर्यंत आम्ही तिथे कोणत्याही आंदोलनाचे आवाहन करणार नाही. तसेच, भविष्यातील सर्व आंदोलने संविधानाच्या चौकटीत राहूनच केली जातील."
अभिजीत दीपके यांची प्रतिक्रिया आणि व्हिडिओ व्हायरल
दोन्ही नेत्यांच्या सुटकेनंतर मनसे समर्थक आणि राजकीय कार्यकर्ते अभिजीत दीपके यांनी आशुतोष रांका आणि सौरभ दास यांचा एक फोटो सोशल मीडियावर शेअर करत, "जर निर्भयतेला चेहरा असता तर…" अशी खास कॅप्शन दिली.
त्यानंतर लगेचच दीपके यांनी एक व्हिडिओ पोस्ट केला, ज्यामध्ये सौरव दास आणि आशुतोष रांका ‘भारत माता की जय’ च्या घोषणा देत मुख्य निवडणूक आयुक्त (CEC) ज्ञानेश कुमार यांच्या राजीनाम्याची मागणी पुन्हा एकदा लावून धरताना दिसत आहेत. या व्हिडिओमुळे राजकीय वर्तुळात पुन्हा एकदा जोरदार चर्चांना उधाण आले आहे.
