"दोन वर्षे जुनी ऑडिओ क्लिप आताच का बाहेर आली? प्रकरणाची सखोल चौकशी व्हावी"
मराठा आरक्षण आंदोलक मनोज जरांगे पाटील यांनी उपमुख्यमंत्र्यांवर केलेल्या ५०० कोटींच्या आरोपांच्या ऑडिओ क्लिप प्रकरणावरून राज्याच्या राजकारणात मोठी खळबळ उडाली आहे. यावर शिवसेनेचे ज्येष्ठ नेते आणि माजी मंत्री रामदास कदम यांनी पत्रकार परिषद घेऊन आक्रमक भूमिका मांडली आहे. मनोज जरांगे यांनी आज जी ऑडिओ क्लिप समोर आणली आहे, ती तब्बल १४ ऑक्टोबर २०२४ रोजीची आहे. मग ही क्लिप गेल्या दोन-अडीच वर्षे लपवून का ठेवण्यात आली आणि आताच निवडणुकांनंतर ती का बाहेर काढण्यात आली, असा थेट सवाल रामदास कदम यांनी उपस्थित केला आहे.
भाजप कनेक्शन आणि गुप्त बैठकांवर मोठे भाष्य
पत्रकार परिषदेत बोलताना रामदास कदम म्हणाले की, ज्या क्लिपचा संदर्भ दिला जात आहे, त्यात संभाजीनगर, ठाणे आणि मुंबईचे कनेक्शन समोर येत आहे. उद्या कोणीही उठून कोणालाही हजार-दोन हजार कोटी दिल्याचा कांगावा करू शकतो, ज्याला शेंडा आणि बुंधा काहीच नाही. विशेष म्हणजे, ज्या व्यक्ती यामागे बोलत आहेत त्यांचा संबंध भाजपशी असल्याचा दावा करत कदम यांनी, यामागे नेमका कोणता राजकीय कट आहे, असा प्रश्न उपस्थित केला.
याच Narration मध्ये पुढे बोलताना रामदास कदम यांनी असाही दावा केला की, जरांगे यांच्या एका गोपनीय बैठकीत भाजपचे आमदार उपस्थित होते आणि त्या बैठकीत "यामध्ये निम्मे पेक्षा जास्त एकनाथ शिंदे यांचे चमचे बसलेत," अशी विधाने करण्यात आली होती, जी रेकॉर्डवर आहेत. जर मराठा समाजाचा नेताच दुसऱ्या नेत्याला संपवण्याचा प्रयत्न करत असेल, तर यामुळे समाजात फूट पडू शकते, अशी खंत त्यांनी व्यक्त केली. छत्रपती शिवाजी महाराजांच्या काळाप्रमाणे मराठ्यांनी एकत्र येऊन लढा दिला पाहिजे, असे आवाहनही त्यांनी यावेळी केले.
उच्चस्तरीय चौकशीची मागणी आणि महिला संभाषणाबाबत आक्रमक पवित्रा
या कथित ऑडिओ क्लिपमध्ये एका महिलेने खासदार डाॅ. श्रीकांत शिंदे यांच्या मार्फत पैसे पोहोचवल्याचा उल्लेख केल्यावरून रामदास कदम यांनी तीव्र संताप व्यक्त केला आहे. ती महिला नेमकी कोण आहे? तिच्याकडे पैसे कुठून आले? आणि तिने हे आरोप कोणत्या आधारावर केले? या सर्व गोष्टींची सत्यता समोर आली पाहिजे, अशी मागणी त्यांनी केली.
एकनाथ शिंदे यांनी मराठा समाजाला न्याय मिळवून देण्यासाठी सर्वोच्च न्यायालयात कायदेशीर लढा देण्यात आणि कागदपत्रांची जुळवाजुळव करण्यात मोठे योगदान दिले आहे, याची आठवणही त्यांनी करून दिली. जर कुणी राजकीय षडयंत्र रचून एकनाथ शिंदे यांची बदनामी करण्याचा प्रयत्न करत असेल, तर तो हाणून पाडला पाहिजे. आपण स्वतः या प्रकरणाची सखोल चौकशी व्हावी यासाठी मुख्यमंत्री आणि केंद्रीय गृहमंत्री अमित शाह यांना लेखी निवेदन देणार असल्याचे रामदास कदम यांनी स्पष्ट केले.
