आरोग्य विभागाची जय्यत तयारी; शाळा, अंगणवाड्या आणि आरोग्य केंद्रांच्या माध्यमातून राबवली जाणार मोहीम
Ratnagiri Health News नुसार, जिल्ह्यातील १ ते १९ वर्षे वयोगटातील बालके आणि किशोरवयीन मुला-मुलींचे आरोग्य सुदृढ राहावे, त्यांच्या शारीरिक व बौद्धिक विकासास योग्य चालना मिळावी आणि त्यांना कृमीसंसर्गापासून पूर्ण संरक्षण लाभावे, यासाठी आरोग्य विभागाच्या वतीने आगामी २७ ऑक्टोबर रोजी ‘राष्ट्रीय जंतनाशक दिन’ मोठ्या प्रमाणावर राबविण्यात येणार आहे. या विशेष मोहिमेंतर्गत रत्नागिरी जिल्ह्यातील १ ते १९ वयोगटातील तब्बल २,६३,४८४ पात्र लाभार्थ्यांना अल्बेंडाझोल जंतनाशक गोळ्यांचे सेवन करवात येणार असल्याची माहिती आरोग्य विभागाने दिली आहे.
प्रशासकीय तयारी आणि प्रशिक्षण
या मोहिमेची जिल्ह्यात प्रभावी अंमलबजावणी व्हावी, यासाठी जिल्हा आरोग्य अधिकारी डॉ. अनिरुद्ध आठल्ये, जिल्हा माता बालसंगोपन अधिकारी डॉ. माधव ठाकूर आणि सर्व तालुका आरोग्य अधिकारी यांच्या मार्गदर्शनाखाली जिल्ह्यातील सर्व तालुक्यांमध्ये वैद्यकीय अधिकारी व पर्यवेक्षकांचे तालुकास्तरीय आढावा व प्रशिक्षण सत्र पूर्ण करण्यात आले आहे. तसेच प्राथमिक आरोग्य केंद्र स्तरावर सर्व आरोग्य कर्मचारी, आशा सेविका, अंगणवाडी सेविका आणि शाळांचे शिक्षक व मुख्याध्यापक यांनाही विशेष प्रशिक्षण देण्यात आले असून, विविध समाजमाध्यमांद्वारे नागरिकांमध्ये व्यापक जनजागृती केली जात आहे.
वयोगटानुसार गोळ्या देण्याची नियमावली:
या मोहिमेत शाळा, महाविद्यालये, अंगणवाडी केंद्रे आणि शासकीय आरोग्य संस्थांच्या माध्यमातून खालीलप्रमाणे वयोगटानुसार जंतनाशक गोळ्या (अल्बेंडाझोल ४०० मिलीग्राम) वितरित केल्या जाणार आहेत:
१ ते २ वर्षे वयोगट: अर्धी गोळी (२०० मिलीग्राम) बारीक करून पाण्यात विरघळवून दिली जाईल.
२ ते ३ वर्षे वयोगट: एक गोळी (४०० मिलीग्राम) बारीक करून पाण्यात विरघळवून दिली जाईल.
३ ते १९ वर्षे वयोगट: एक पूर्ण गोळी (४०० मिलीग्राम) चावून खाण्यास दिली जाईल.
३ नोव्हेंबर रोजी ‘मॉप-अप दिन’
ज्या पात्र बालकांना किंवा विद्यार्थ्यांना २७ ऑक्टोबर रोजीच्या मुख्य जंतनाशक दिनी काही कारणास्तव गोळी घेता येणार नाही, अशा वंचित बालकांसाठी आगामी ३ नोव्हेंबर रोजी ‘मॉप-अप दिन’ आयोजित करण्यात आला आहे. या दिवशी राहिलेल्या सर्व मुलांना जंतनाशक गोळी देण्यात येणार आहे.
प्रशासनाचे पालकांना व शिक्षकांना आवाहन
पालकांनी आपल्या पाल्याने जंतनाशक गोळी घेतल्याची खात्री करणे गरजेचे आहे. तसेच शाळांमधील शिक्षकांनी सर्व पात्र विद्यार्थ्यांना गोळी घेण्यास प्रवृत्त करत आरोग्य विभागास पूर्ण सहकार्य करावे. ही मोहीम यशस्वी करण्यासाठी आरोग्य विभाग, शिक्षण विभाग आणि महिला व बालविकास विभाग यांनी समन्वयाने काम करावे, असे आवाहन जिल्हा परिषद अध्यक्षा श्रीमती अस्मिता केंद्रे, उपाध्यक्ष विलास चाळके, मुख्य कार्यकारी अधिकारी श्रीमती वैदेही रानडे आणि जिल्हा आरोग्य अधिकारी डॉ. अनिरुद्ध आठल्ये यांनी केले आहे.
