पाणीटंचाईचे सावट गडद असताना प्रदूषणाचा संतापजनक प्रकार; नदीपात्रात वाहने धुण्याचे प्रकारही वाढीस
Khed News नुसार, नदी ही केवळ पाण्याचा स्रोत नसून संपूर्ण परिसराची जीवनवाहिनी असते. मात्र, खेड-आंबवली मार्गावरील सुकीवली येथील चोरद नदीत टाकाऊ निर्माल्य आणि कचरा टाकण्याचे प्रकार वाढल्याने या जीवनवाहिनीचे अस्तित्वच धोक्यात आले आहे. पाणीटंचाईचे संकट गडद होत असताना नदीपात्रात बिनदिक्कतपणे कचरा टाकून पाण्याचे प्रदूषण करणाऱ्यांच्या बेजबाबदारपणामुळे नागरिकांच्या आरोग्याचा प्रश्न ऐरणीवर आला असून येथील ग्रामस्थांत संतापाचे वातावरण पसरले आहे.
सध्या चोरद नदीतील पाण्याची पातळी घटली असून पात्रातील पाणी आटत चालले आहे. अशा परिस्थितीत उपलब्ध पाण्याचे जतन करणे आणि ते स्वच्छ ठेवणे अत्यंत गरजेचे असताना, नदीत निर्माल्य, पूजेतील साहित्य आणि इतर कचरा टाकण्याचे प्रकार सुरूच आहेत. येता-जाता नदीपात्रात कचरा फेकणाऱ्या नागरिकांना ना पर्यावरणाची चिंता, ना पाण्याच्या महत्त्वाचे भान राहिल्याचे दिसून येत आहे.
एकीकडे पाण्यासाठी वणवण आणि दुसरीकडे पाण्याचे प्रदूषण, हा विरोधाभास संतापजनक आहे. विशेष म्हणजे, पाणीटंचाईच्या काळात याच चोरद नदीपात्रातील पाण्याच्या आधारे तालुक्यातील टंचाईग्रस्त गाव-वाड्यांची तहान भागवली जाते व टँकरद्वारे पाणीपुरवठा केला जातो. यंदा पाणीटंचाईचे मोठे सावट निर्माण होण्याची शक्यता असताना नदीचे पाणी दूषित करण्याचे प्रकार भविष्यातील पाणी संकटाला निमंत्रण देण्यासारखे आहेत. यात भर म्हणजे नदीपात्रात वाहने धुण्याचे प्रकारही घडत असल्याने पाण्याच्या स्वच्छतेबाबत गंभीर प्रश्न निर्माण झाला आहे.
नदीपात्रात निर्माल्य व कचरा टाकणाऱ्यांवर नियंत्रण ठेवणे, जनजागृती करणे आणि नदी परिसराची नियमित स्वच्छता राखणे अत्यंत आवश्यक आहे. ग्रामपंचायत व संबंधित विभागांनी याकडे तातडीने लक्ष देऊन ठोस उपाययोजना कराव्यात, अशी मागणी स्थानिक नागरिकांमधून केली जात आहे.
