चाकरमान्यांचा प्रवास सुखकर व्हावयासाठी एसटी महामंडळाचा पुढाकार; पश्चिम महाराष्ट्र, विदर्भ आणि मराठवाड्यात सुटणार गाड्या
Ratnagiri ST Bus News नुसार, नोकरी, व्यवसाय आणि विविध कामानिमित्त रत्नागिरीत वास्तव्यास असणारे इतर जिल्ह्यांतील चाकरमानी दिवाळी सणानिमित्त मोठ्या संख्येने आपल्या मूळगावी जात असतात. प्रवाशांची कोणतीही गैरसोय होऊ नये आणि त्यांचा प्रवास सुरक्षित व सुखकर व्हावा, यासाठी रत्नागिरी एसटी विभागाच्या वतीने ६ नोव्हेंबर ते १४ नोव्हेंबर दरम्यान विशेष नियोजन करण्यात आले आहे. या दहा दिवसांच्या कालावधीत पश्चिम महाराष्ट्र, विदर्भ आणि मराठवाड्यासह विविध प्रमुख मार्गांवर दररोज ३५ अशा एकूण ३५० एसटी बसेस सोडण्यात येणार आहेत. या विशेष बसफेऱ्यांच्या ऑनलाइन बुकिंगला आता सुरुवात झाली आहे.
येत्या ५ नोव्हेंबरपासून शाळा-महाविद्यालयांना दिवाळीची सुट्टी जाहीर होत आहे. कोकणात किंवा इतरत्र कामानिमित्त आलेले नागरिक आपल्या गावी जाण्यासाठी नेहमीच एसटीच्या ‘लालपरीला’ प्राधान्य देत असतात. त्यामुळे प्रवाशांच्या गर्दीचा ताण लक्षात घेता रत्नागिरी विभागाने हा अतिरिक्त बसेसचा निर्णय घेतला असून, जिल्ह्यातील चाकरमान्यांनी प्रवासासाठी आताच आपले तिकीट आरक्षण (Online Booking) करून घ्यावे, असे आवाहन एसटी महामंडळाच्या वतीने करण्यात आले आहे.
कुठे धावणार विशेष बसेस?
दिवाळीनिमित्त सोडण्यात येणाऱ्या या बसेस प्रामुख्याने पश्चिम महाराष्ट्रातील पुणे, सांगली, सातारा, कोल्हापूर, सोलापूर; मराठवाड्यातील धाराशिव, बीड; तसेच विदर्भातील नागपूर, अमरावती, अकोला, वाशिम, यवतमाळ, चंद्रपूर, बुलढाणा आणि वर्धा या जिल्ह्यांसाठी धावणार आहेत.
दिवाळी प्रवासात मिळणार विशेष सवलतींचा लाभ
दिवाळीच्या पार्श्वभूमीवर एसटी प्रवाशांसाठी शासनाच्या नियमानुसार विविध सवलती लागू असणार आहेत. यामध्ये सर्व महिला आणि तरुणींना तसेच ६५ ते ७५ वयोगटातील ज्येष्ठ नागरिकांना एसटी प्रवासाच्या तिकिटात ५० टक्के सवलत मिळणार आहे. तर ७५ वर्षांपुढील ज्येष्ठांसाठी १०० टक्के सवलत असून त्यांचा प्रवास पूर्णपणे मोफत असणार आहे. तथापि, या सवलतींचा लाभ घेण्यासाठी प्रवाशांकडे ‘एनसीएमसी’ (NCMC) कार्ड असणे बंधनकारक करण्यात आले आहे. प्रवाशांनी हे कार्ड आपल्यासोबत बाळगावे आणि आधीच रिचार्ज करून ठेवावे, अन्यथा त्यांना संपूर्ण तिकीट द्यावे लागेल, अशी सूचनाही एसटी विभागाने दिली आहे.
