चिपळूण : सर्वोच्च न्यायालयाने संक्शन पंपाने वाळू उपसण्यावर बंदी आणलेली असतानाही संक्शन पंपाने वाळू उपसा येथील करबंवणे-बहिरवली खाडीत अवैधपणे सुरू आहे. याप्रकरणी अनेक तक्रारी होत असल्याने याबाबत जिल्हाधिकारी एम. देवेंदर सिंह यांनी गंभीर दखल घेत चिपळूणचे तहसीलदार प्रवीण लोकरे यांना नुकताच एका पत्राद्वारे जाब विचारला आहे. तातडीने कारवाई करून याबाबत करण्याच्या तसा अहवाल सादर सूचनाही दिल्या आहेत.
तालुक्यातील करंबवणे-बहिरवली खाडीत गेल्या काही महिन्यांपासून रात्रंदिवस सक्शन पंपाद्वारे बेकायदा वाळू उत्खनन केले जात असल्याची ओरड सुरू आहे. याबाबत संबंधित मंडल अधिकारी तलाठी व स्थानिक अधिकारी याकडे कानाडोळा करत असल्याच्या तक्रारी होत आहेत. वाळू उत्खननासह होणाऱ्या चोरट्या वाहतुकीच्याही अनेक तक्रारी चिपळूण तहसीलदार व महसूल विभागाकडे सातत्याने फोनद्वारे झाल्या आहेत; मात्र तरीही कारवाई होत नाही.
त्यामुळे चोरटा वाळू व्यवसाय तेजीत आहे. काही दिवसांपूर्वी जिल्हा खनीकर्म विभागाने येथे कारवाई केली होती; मात्र त्यानंतरही चोरटा वाळू व्यवसाय सुरू आहे. एकीकडे सर्वोच्च न्यायालयाने संक्शन पंपाने वाळू उत्खनन करण्यास बंदी घातली आहे. संक्शन पंपाने वाळू उपसा केल्याने होणाऱ्या परिणामांच्या पार्श्वभूमीवर बंदी घातली आहे; मात्र तरीही करंबवणे, मालदोली गावातून संक्शन पंपाद्वारे वाळू उपसा अवैध बेकायदेशीर आणि विना रॉयल्टी वाळू उत्खनन सुरू आहे. वाळू उत्खनन संक्शन पंपाने होत असल्याबाबतचे तीन तक्रार अर्ज चिपळूण तहसीलदार लोकरे यांच्याकडे देऊनही कारवाई होत नसल्याचे संबंधित तक्रारदाराने जिल्हाधिकाऱ्यांकडे दिलेल्या तक्रारअर्जात नमूद केले आहे. त्याप्रमाणे जिल्हाधिकारी एम. देवेदर सिंह यांनी या विषयी गंभीरपणे दखल घेत याबाबतचा जाब विचारला आहे.
गेले काही महिने चिपळूण हद्दीत वाळू उत्खनन पूर्णतः बंद आहे. भरारी पथकामार्फत दिवसरात्र गस्त घातली जात आहे. तसेच तक्रार येताच तातडीने कारवाईदेखील केली जात आहे. – प्रवीण लोकरे, तहसीलदार, चिपळूण
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:46 AM 11/Jan/2025
