मुंबई : मस्साजोगचे सरपंच संतोष देशमुख यांच्या हत्येनंतर मोठी खळबळ निर्माण झाली. कालपासून देशमुखांच्या हत्येवेळचे काही फोटो व्हायरल होताना दिसत आहेत. या फोटोंनंतर लोकांनी संताप व्यक्त केला. धनंजय मुंडे यांच्यावर राजीनाम्यासाठी दबाव वाढला आणि शेवटी धनंजय मुंडे यांनी आपला राजीनामा मुख्यमंत्री देवेंद्र फडणवीस यांच्याकडे दिला. मुख्यमंत्र्यांनी धनंजय मुंडे यांचा राजीनामा स्वीकारला आहे. आता आष्टीचे आमदार सुरेश धस यांनी काही आरोप केले आहेत. सरकारवरही धनंजय मुंडेंच्या राजीनाम्यासाठी दबाव होता.
आता धनंजय मुंडे यांच्या राजीनाम्याबद्दल बोलताना आदित्य ठाकरे म्हणाले की, फक्त त्यांचा राजीनामा घेऊन चालणार नाही तर त्यांचे सरकार बरखास्त झाले पाहिजे. संपूर्ण महाराष्ट्रात कायदा आणि सुव्यवस्थेची परिस्थिती आपण पाहात आहेत. कुठे लहान मुलींवर अत्याचार तर कुठे महिलांवर रेप होतो. डिसेंबरमध्ये हा खून झाला आणि त्यानंतर अधिवेशन झाले. त्यावेळी आम्ही विरोधकांनी राजीनाम्यांची मागणी लावून धरली होती. फक्त आम्ही नाही तर भाजपाच्या आमदारांनी देखील धनंजय मुंडे यांच्या राजीनाम्याची मागणी केली होती.
गेल्या अधिवेशनातच मुख्यमंत्री राजीनामा घेतील, असे आम्हाला वाटले होते. मात्र, मुख्यमंत्र्यांचे हात नेमके कुठे बांधले होते. मैत्रीचे कारण होते की, अजून कोणते हे आम्हाला माहिती नाहीये. पण त्यांनी आम्हाला सांगितले होते की, आम्ही न्याय देऊन आणि लवकरात लवकर चाैकशी लावू. शेवटी काल अधिवेशन सुरू झाले आणि काल जे भयानक फोटो आले आणि सर्वचजण हादरून गेले. ते पाहताना देखील डोळ्यात पाणी येत होते. धनंजय मुंडे यांना सहआरोपी करा, असेही आदित्य ठाकरे यांनी म्हटले आहे.
पुढे आदित्य ठाकरे म्हणाले की, अजूनही विचार करू शकत नाही की हे सर्व फोटो पाहून त्यांच्या मनावर काय होत असेल. या सरपंचला न्याय द्या. काल रात्री मुख्यमंत्री अजितदादांच्या घरी गेले आणि राजीनामा घ्यायचा की नाही यावर चर्चा झाली. मुख्यमंत्र्यांनी तसे करण्यापेक्षा राजीनामा मागून घ्यायला हवा होता. काल रात्रीच्या बैठकीत धनंजय मुंडे यांच्या राजीनाम्याचा निर्णय झाल्याचे सांगितले जातंय. इथे थांबून चालणार नसल्याचेही स्पष्टपणे सांगताना आदित्य ठाकरे हे दिसले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:54 04-03-2025
