दापोली : दापोली तालुक्यातील वाकवली येथे रस्त्याच्या कामात व्यस्त असलेल्या मजुरांवर लोखंडी गजाने हल्ला करून एकाला जखमी करण्याची धक्कादायक घटना घडली आहे. ही घटना २० मार्च २०२५ रोजी सायंकाळी ५:३० वाजण्याच्या सुमारास घडली असून, याप्रकरणी दापोली पोलिस ठाण्यात एका व्यक्तीविरुद्ध गुन्हा दाखल करण्यात आला आहे.
फिर्यादी राजेंद्र रामदास जाधव (वय ४५, मूळ रा. मु.पो. लोणशी, ता. माणगाव, जि. रायगड; सध्या रा. वाकवली, ता. दापोली, जि. रत्नागिरी) यांनी दिलेल्या तक्रारीनुसार, ते आणि त्यांच्यासोबत तीन कामगार – उत्कर्ष अशोक कभार (रा. कराड, ता. कराड, जि. सातारा), ओमकार प्रफुल्ल धारिया (रा. गवळाई, ता. महाड, जि. रायगड) आणि संचित लक्ष्मण बामणे (रा. मु.पो. कापडी ब, ता. पोलादपूर, जि. रायगड) – हे वाकवली येथे रस्त्याचे काम करत होते. यावेळी आरोपी रोहित गौतम जाधव (वय ३६, रा. खारगल्ली, ता. दापोली, जि. रत्नागिरी) तिथे आला आणि त्याने फिर्यादी व कामगारांना शिवीगाळ सुरू केली.
आरोपीने रस्त्याच्या कडेला पडलेला लोखंडी गज हातात घेतला आणि फिर्यादी यांच्यावर समोरून धावत येऊन हल्ला चढवला. त्याने फिर्यादी यांच्या पाठीमागे जाऊन लोखंडी गजाने जोरदार प्रहार केला, ज्यामुळे फिर्यादी यांच्या पाठीवर गंभीर दुखापत झाली. हल्ल्यानंतर आरोपीने “तुला जीवे ठार मारीन,” अशी धमकी देत घटनास्थळावरून पळ काढला.
या हल्ल्यात फिर्यादी राजेंद्र रामदास जाधव गंभीर जखमी झाले असून, त्यांच्या पाठीवर लोखंडी गजाच्या प्रहारामुळे जखमा झाल्या आहेत. त्यांना तातडीने वैद्यकीय उपचारासाठी रुग्णालयात दाखल करण्यात आले असून, त्यांची प्रकृती स्थिर असल्याचे समजते.
या घटनेची तक्रार प्राप्त झाल्यानंतर दापोली पोलिसांनी त्वरित कारवाई करत २० मार्च २०२५ रोजी रात्री ११:०२ वाजता गुन्हा दाखल केला. गुन्हा क्रमांक ५३/२०२५ अंतर्गत भारतीय न्यायसंहिता अधिनियम २०२३ च्या कलम ११८(१), ३५२ आणि ३५१(२) अन्वये हा गुन्हा नोंदवण्यात आला आहे. आरोपी रोहित गौतम जाधव याच्याविरुद्ध गुन्हा दाखल करण्यात आलाय.
वाकवली येथे दिवसाढवळ्या घडलेल्या या हिंसक घटनेमुळे स्थानिकांमध्ये भीतीचे वातावरण पसरले आहे. रस्त्याच्या कामात व्यस्त असलेल्या मजुरांवर अचानक झालेल्या हल्ल्याने परिसरात संताप व्यक्त होत आहे. पोलिसांनी नागरिकांना शांतता राखण्याचे आणि कोणत्याही अफवांवर विश्वास न ठेवण्याचे आवाहन केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:54 AM 21/Mar/2025
