मुंबई : बिग बॉस मराठीच्या पाचव्या पर्वाचा प्रवास अवघ्या काही तासांमध्ये संपणार आहे. १०० दिवसांसाठी निश्चित झालेला हा शो अवघ्या ७० दिवसात आटोपणार असून ६ ऑक्टोबर रोजी Bigg Boss Marathi Season 5 चा ग्रँड फिनाले प्रसारित होणार आहे. रविवारी संध्याकाळी ६ वाजल्यापासून या कार्यक्रमाला सुरुवात होईल. दरम्यान ग्रँड फिनालेची खासियत अशी असते की या एपिसोडमध्ये आतापर्यंत बिग बॉसच्या घरातून बाहेर पडलेले सदस्य पुन्हा एकदा फायनलिस्ट स्पर्धकांना भेटण्यासाठी येतात. यानुसार या पर्वाच्या ग्रँड फिनालेमध्येही आतापर्यंत एव्हिक्ट झालेले स्पर्धक सहभागी होणार आहेत. अलीकडेच या स्पर्धकांचा प्रोमो समोर आला आहे, मात्र त्यामध्ये आर्या जाधव ही स्पर्धक दिसली नाही.
आर्याला काढलेले घराबाहेर
काही एपिसोडपूर्वी आर्या आणि निक्की यांच्यामधील भांडणाचे रुपांतर हिंसेमध्ये झाले, आर्याने निक्कीच्या कानशिलात लगावली आणि परिणामी तिला घराबाहेर पडावे लागले होते. कार्यक्रमाचा होस्ट रितेश देशमुखने आर्याला बाहेरचा रस्ता दाखवला होता. आर्याचे रीतसर एलिमिनेशन न होता तिच्या चुकीच्या वर्तनामुळे तिला घराबाहेर जाण्याचे आदेश देण्यात आलेले. रितेश आणि बिग बॉसने तिच्या वर्तनावरुन व्यक्त केलेली नाराजी ग्रँड फिनालेमध्येही कायम राहिल्याचे दिसते आहे, कारण समोर आलेल्या प्रोमोमध्ये आर्या कुठेही दिसली नाही.
याशिवाय या प्रोमोमधील निक्की आणि अरबाज यांच्या संभाषणाने लक्ष वेधले. अरबाज बाहेर गेल्यानंतर निक्की ओक्साबोक्शी रडली होती. त्यानंतर निक्कीच्या आईने जेव्हा तिला सांगितले की अरबाजचा साखरपुडा झाला आहे, तेव्हा निक्कीला त्याचा प्रचंड राग आलेला. त्यावेळी तिने जाहीर केलेले की तिला अरबाजचे तोंड बघायचीही इच्छा नाही. समोर आलेल्या प्रोमोमध्ये तर वेगळेच चित्र पाहायला मिळाले. अरबाजने घरात धावत येताच, निक्कीला उचलून धरले आणि ते दोघे हातात हात घालून बोलतानाही दिसले.
१७ स्पर्धकांनी घेतलेला सहभाग
बिग बॉस मराठीच्या या पर्वात वर्षा उसगांवकर, निखिल दामले, अंकिता प्रभू वालावलकर, पंढरीनाथ कांबळे, योगिता चव्हाण, जान्हवी किल्लेकर, अभिजीत सावंत, घन:श्याम दरोडे, इरिना रुडाकोव्हा, निक्की तांबोळी, अरबाज पटेल, वैभव चव्हाण, आर्या जाधव, पुरुषोत्तम दादा पाटील, धनंजय पोवार आणि सूरज चव्हाण हे १६ स्पर्धक सहभागी झालेले. तर संग्राम चौघुले या स्पर्धकाने वाइल्ड कार्ड एन्ट्री केलेली. यांच्यापैकी निक्की, अभिजीत, धनंजय, जान्हवी, सूरज आणि अंकिता हे फायनलिस्ट झाले आहेत. यांच्यापैकी बिग बॉस मराठीच्या या पर्वाची ट्रॉफी कोण उचलेल, हे पाहणे महत्त्वाचे ठरेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:04 05-10-2024
