मुंबई : महाराष्ट्र नवनिर्माण सेनेचे (मनसे) अध्यक्ष राज ठाकरे यांनी आपल्या महाराष्ट्र सैनिकांना उद्देशून एक नवे पत्र जारी केले आहे. या पत्रात त्यांनी मराठी भाषेसाठी सुरू असलेले आंदोलन तूर्तास थांबवण्याच्या सूचना दिल्या आहेत. तसेच, मराठीचा सन्मान राखण्याची जबाबदारी आता सरकार आणि मराठी जनतेवर असल्याचे स्पष्ट केले आहे. हे पत्र सोशल मीडियावर व्हायरल होत असून, यामुळे राजकीय वर्तुळात चर्चा सुरू झाली आहे.
मराठीसाठी जोरदार आवाज, पण आता थांबण्याचा निर्णय
राज ठाकरे यांनी पत्रात लिहिले आहे की, गुढीपाडव्याच्या मेळाव्यात त्यांनी महाराष्ट्र सैनिकांना बँकांमध्ये मराठीत व्यवहार होत आहेत की नाही हे तपासण्याचे आणि जागृती करण्याचे आदेश दिले होते. त्यानुसार, मनसे कार्यकर्त्यांनी राज्यभर बँकांमध्ये मराठीचा आग्रह धरला आणि यातून मराठी भाषेची ताकद आणि मनसेची संघटनात्मक शक्ती दिसून आली. “मराठी माणूस आणि भाषा यांना कोणी गृहीत धरू शकत नाही, हा संदेश स्पष्टपणे गेला,” असे राज ठाकरे यांनी नमूद केले. मात्र, आता पुरेशी जागृती झाल्याने आणि सरकारला जबाबदारी सोपवून हे आंदोलन थांबवण्याचा निर्णय त्यांनी घेतला आहे.
सरकारवर ठेवली मोठी जबाबदारी
पत्रात राज ठाकरे यांनी राज्य सरकार आणि मुख्यमंत्री यांच्यावरही भाष्य केले आहे. ते म्हणाले, “रिझर्व्ह बँकेचा मराठीत व्यवहारांचा नियम सरकारला माहीत आहे. त्याची अंमलबजावणी करणे ही सरकारची जबाबदारी आहे.” मुख्यमंत्री म्हणाले होते की, कोणाला कायदा हातात घेऊ देणार नाही. यावर राज ठाकरे यांनी प्रत्युत्तर दिले, “कायद्याचे रक्षक तुम्ही आहात, तर मग बँकांना आणि आस्थापनांना मराठीचा सन्मान करायला लावणे हे तुमचे काम नाही का? तुम्ही हे केले तर आम्हाला कायदा हातात घ्यावा लागणार नाही.”
मराठी जनतेला आवाहन, सैनिकांना सतर्क राहण्याचे निर्देश
राज ठाकरे यांनी मराठी जनतेला स्वतःहून मराठीचा आग्रह धरण्याचे आवाहन केले आहे. “जर मराठी समाजानेच कच खाल्ली, तर मग ही आंदोलने कशासाठी?” असा सवाल त्यांनी उपस्थित केला. तसेच, महाराष्ट्र सैनिकांना आंदोलन थांबवण्यास सांगितले असले तरी मराठीच्या मुद्द्यावर लक्ष ठेवण्याचे आणि गरज पडल्यास पुन्हा चर्चेसाठी पुढे येण्याचे निर्देश दिले आहेत.
राजकीय चर्चेला उधाण
या पत्रामुळे राज ठाकरे यांनी एकीकडे आंदोलन थांबवून संयम दाखवला असला तरी सरकारवर दबाव टाकण्याची रणनीती कायम ठेवली आहे. मराठी भाषा आणि अस्मितेचा मुद्दा पुन्हा एकदा चर्चेत आला असून, येत्या काळात सरकार काय पावले उचलते, हे पाहणे महत्त्वाचे ठरणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:46 05-04-2025
