गुहागर : गुहागर तालुक्यातील महर्षी परशुराम अभियांत्रिकी महाविद्यालय, वेळणेश्वरच्या वतीने कनिष्ठ महाविद्यालयातील विज्ञान शाखेच्या विद्यार्थ्यांमध्ये वैज्ञानिक जिज्ञासा आणि नवकल्पना वाढविण्याच्या दृष्टीने दि. ४ ऑक्टोबर रोजी ‘जिल्हास्तरीय प्रकल्प २०२४’ या स्पर्धेचे आयोजन केले गेले. या स्पर्धेचे यंदाचे दुसरे वर्ष होते.
विद्यार्थ्यांना वैज्ञानिक संकल्पना स्वतःच एक्सप्लोर करण्याची, गंभीर विचारसरणी आणि सर्जनशीलता वाढवण्याची संधी या स्पर्धेच्या निमित्ताने मिळाली. ही नावीन्यपूर्ण स्पर्धा केवळ वैज्ञानिक पराक्रमावर प्रकाश टाकत नाही, तर व्यावहारिक शिक्षणाचे सारदेखील मूर्त स्वरूपात देते. या स्पर्धेसाठी आलेल्या प्रकल्पांतून तीन सर्वोत्तम प्रकल्पांची निवड करण्यात आली. यामध्ये प्रथम क्रमांक गुहागर तालुक्यातील न्यू इंग्लिश स्कूल व कनिष्ठ महाविद्यालय पाटपन्हाळे महाविद्यालयास प्राप्त झाले. विजेत्या प्रकल्पास रोख रक्कम ७००० रुपये व प्रमाणपत्र देऊन गौरविण्यात आले. द्वितीय व तृतीय क्रमांक रबिया शेख अहमद नाखवा कनिष्ठ महाविद्यालय, पावस रत्नागिरी या महाविद्यालयाच्या ग्रुप दोन व तीन या प्रकल्पधारकांना विजयी घोषित करण्यात आले. यांना प्रत्येकी रु. ५००० व रु. ३००० इतक्या रकमेचे दोन पुरस्कार व प्रमाणपत्र देऊन सन्मानित करण्यात आले.
या स्पर्धेमध्ये जिल्ह्यातील एकूण ६ कनिष्ठ महाविद्यालये सहभागी झाले होती. या महाविद्यालयांमधून विविध १४ समूहांनी सहभाग नोंदविला. या स्पर्धेचे परीक्षण वेळणेश्वर अभियांत्रिकी महाविद्यालयातील विद्युत विभागाचे प्रमुख प्रा. सतीश घोरपडे व संगणक अभियांत्रिकी विभागाचे प्रमुख प्रा. केतन कुंडिया यांनी काम पाहिले.
या स्पर्धेचे समन्वयक प्रथम वर्ष अभियांत्रिकी विभागप्रमुख डॉ. गणेश दिवे यांनी काम पाहिले. ही स्पर्धा यशस्वी करण्यासाठी महाविद्यालयाचे प्राचार्य डॉ. नरेंद्र सोनी, उपप्राचार्य अविनाश पवार यांच्या मार्गदर्शनाखाली शिक्षक- शिक्षकेतर कर्मचारी यांचे सहकार्य लाभले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
02:33 PM 08/Oct/2024
