रत्नागिरी, २८ एप्रिल २०२५ : रत्नागिरी पोलिसांनी 24 तास सेवा देणाऱ्या मेडिकल स्टोअर्सना रात्री 11 नंतर शीतपेय विक्रीवर बंदी घातली आहे. अंमली पदार्थांच्या विरोधात सुरू असलेल्या कारवाईच्या पार्श्वभूमीवर पोलिसांनी हा निर्णय घेतला आहे. डिप्रेशनच्या गोळ्या शीतपेयात मिसळून नशा करणाऱ्या टोळ्यांची माहिती मिळाल्यानंतर पोलिसांनी ही मोहीम हाती घेतली. या नियमाचे उल्लंघन करणाऱ्या मेडिकल दुकानदारांना 50 हजार रुपयांचा दंड ठोठावण्याचा इशारा देण्यात आला आहे आशी माहिती जिल्हा पोलीस अधीक्षक धनंजय कुलकर्णी यांनी दिली आहे.
काय आहे कारण?
रत्नागिरी जिल्ह्यात अंमली पदार्थांच्या विरोधात पोलिसांनी तीव्र कारवाई सुरू केली आहे. या कारवाईदरम्यान, काही मंडळी डिप्रेशनच्या गोळ्या शीतपेयात टाकून नशा करत असल्याची धक्कादायक माहिती समोर आली. रात्री उशिरा 24 तास मेडिकल स्टोअर्समधून शीतपेय खरेदी करून ही नशा केली जाते. यामुळे पोलिसांनी सर्व 24 तास मेडिकल दुकानांना नोटीसा बजावून रात्री 11 नंतर शीतपेय आणि आयस्क्रीमसारख्या वस्तूंची विक्री थांबवण्याचे आदेश दिले.
मेडिकल स्टोअर्सवर कडक नियम
24 तास मेडिकल दुकानांना केवळ औषधे विकण्याची परवानगी आहे. मात्र, अनेक दुकानदार रात्री उशिरा जनरल स्टोअरप्रमाणे शीतपेय, आयस्क्रीम आणि इतर अन्नपदार्थ विकतात. पोलिसांनी या दुकानदारांची झोप उडवली असून, रात्री 11 नंतर शीतपेय विक्री करणाऱ्यांवर 50 हजार रुपयांचा दंड आकारण्याची तरतूद केली आहे. या आदेशानंतर काही मेडिकल दुकानदारांनी दुकानाबाहेर “रात्री 11 नंतर फक्त औषधे मिळतील” असे फलक लावले आहेत.
अंमली पदार्थांविरोधी मोहीम
रत्नागिरी पोलिसांची अंमली पदार्थांविरोधी मोहीम गेल्या काही महिन्यांपासून तीव्र झाली आहे. डिप्रेशनच्या गोळ्यांचा गैरवापर रोखण्यासाठी पोलिसांनी मेडिकल स्टोअर्सवर लक्ष केंद्रित केले आहे. शीतपेयांच्या माध्यमातून नशेचा प्रसार होत असल्याने हा निर्णय घेण्यात आला. “रात्री उशिरा शीतपेय विक्रीमुळे नशेच्या घटना वाढत आहेत. ही बाब गंभीर आहे,” असे पोलिसांनी सांगितले.
दुकानदारांचे धाबे दणाणले
पोलिसांच्या या कठोर निर्णयामुळे 24 तास जनरल स्टोअर प्रमाणे व्यवसाय करणाऱ्या मेडिकल दुकानदारांचे धाबे दणाणले आहेत. काही दुकानदारांनी तातडीने शीतपेय आणि आयस्क्रीम विक्री बंद केली आहे. स्थानिक नागरिकांनी या निर्णयाचे स्वागत केले असून, अंमली पदार्थांचा गैरवापर रोखण्यासाठी पोलिसांचे कौतुक केले आहे.
रत्नागिरी पोलिसांनी या नियमाची कडक अंमलबजावणी सुरू केली आहे. मेडिकल दुकानदारांवर पोलिसांची करडी नजर आहे. या मोहिमेमुळे अंमली पदार्थांचा गैरवापर रोखण्यात यश मिळेल, असा विश्वास पोलिसांना आहे. नागरिकांनीही संशयास्पद हालचालींची माहिती पोलिसांना देण्याचे आवाहन केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:42 28-04-2025
