रत्नागिरी : व्हिसाचा कालावधी संपूनही शहरातील साळवी स्टॉप येथे बेकायदेशीरपणे वास्तव्य तसेच बनावट कागदपत्रे तयार करणाऱ्या बांगला देशी महिलेला न्यायालयाने बुधवारी सहा महिने साध्या कारावासाची शिक्षा सुनावली. या महिलेला १७जानेवारी २०२५ रोजी दहशतवादविरोधी – पथकाकडून अटक करण्यात आली होती.
सलमा खातून बिलाल मुल्ला ऊर्फ सलमा – राहिल भोंबल (३०, रा. सफा टॉवर्स बिल्डिंग ए विंगमधील फ्लॅट नंबर ए ९, साळवी स्टॉप, रत्नागिरी) असे या महिलेचे नाव आहे. सलमा १६ डिसेंबर २०१६ रोजी ९० दिवसांचा व्हिसा घेऊन – भारतात आली होती. यावेळी तिचे वास्तव्य – शृंगारतळी गुहागर या ठिकाणी होते. या नंतर सलमाने राहिल भोंबल याच्याशी विवाह केला. तसेच व्हिसाची मुदत संपली असतानाही तिने २०१७ ते २०२५ या कालावधीत अवैधरीत्या भारतात वास्तव्य केले.
या काळात सलमा हिने आधारकार्ड, पॅनकार्ड, जन्मदाखला आदी बनावट कागदपत्रे तयार करून भारतात वास्तव्य केले. तिच्या विरोधात शहर पोलिस ठाण्यात भारतीय न्यायसंहिता १९५० चा नियम ३ (ए), ६ (ए) विदेशी व्यक्ती अधिनियम १९४६ चे कलम १४ (अ) व कलम ७ प्रमाणे गुन्हा दाखल करण्यात आला होता. हा खटला न्यायालयात सुरू होता. बुधवारी मुख्य न्याय दंडाधिकारी गोसावी यांनी आरोपी महिलेला ६ महिने साधा कारावास व पाचशे रुपये दंड तो न भरल्यास १ दिवस साधा कारावास, अशी शिक्षा सुनावली. या खटल्यात शहर पोलिस ठाण्याचे पोलिस निरीक्षक सतीश शिवरकर यांच्या मार्गदर्शनाखाली तपास अधिकारी पोलिस उपनिरीक्षक शितल पाटील, महिला पोलिस हवालदार साळवी यांनी काम पाहिले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:03 AM 15/May/2025
