रत्नागिरी : संगमेश्वर रेल्वे स्टेशनवर प्रवासादरम्यान एका सेवानिवृत्त व्यक्तीचा मोबाईल चोरीस गेल्याची घटना घडली. यानंतर चोरट्याने चोरीच्या मोबाईलचा वापर करून फिर्यादीच्या बँक खात्यातून १६,९०० रुपये लंपास केल्याचा धक्कादायक प्रकार उघडकीस आला आहे. या प्रकरणी संतोष सुभाष राणे (वय ४२, रा. सडुरे, वैभववाडी, जि. सिंधुदुर्ग) यांनी १७ मे २०२५ रोजी देवरुख पोलिस ठाण्यात तक्रार दाखल केली. भारतीय न्यायसंहिता २०२३ च्या कलम ३०५(क) आणि ३१८(४) अंतर्गत गुन्हा नोंदवण्यात आला आहे.
फिर्यादी संतोष राणे यांनी दिलेल्या माहितीनुसार, २२ एप्रिल २०२५ रोजी ते दिवा ते सावंतवाडी पॅसेंजर रेल्वेने प्रवास करत होते. संगमेश्वर रेल्वे स्टेशनवर रात्री ००.४५ च्या सुमारास त्यांचा विवो वाय ३६ मॉडेलचा निळसर-काळपट रंगाचा मोबाईल (किंमत १०,००० रुपये) अज्ञात चोरट्याने चोरला. चोरी झाल्याचे लक्षात आल्यानंतर राणे यांनी वैभववाडी येथील स्टेट बँक ऑफ इंडियाच्या शाखेत जाऊन खात्याची पडताळणी केली. तेव्हा त्यांना २२ एप्रिल ते २ मे २०२५ या कालावधीत त्यांच्या खात्यातून १६,९०० रुपये काढल्याचे आढळले. चोरट्याने चोरीच्या मोबाईलचा वापर करून फसवणूक केल्याचे स्पष्ट झाले.
पोलिसांनी अज्ञात चोरट्याविरुद्ध गुन्हा नोंदवून तपास सुरू केला आहे. चोरीचा मोबाईल आणि बँक खात्यातून पैसे काढण्यासाठी वापरलेल्या तपशीलांचा शोध घेतला जात आहे. या घटनेमुळे रेल्वे प्रवासादरम्यान सुरक्षिततेचा प्रश्न उपस्थित झाला आहे. पोलिसांनी नागरिकांना प्रवासात मौल्यवान वस्तूंची काळजी घेण्याचे आणि संशयास्पद हालचाली दिसल्यास त्वरित संपर्क साधण्याचे आवाहन केले आहे. सध्या पोलिस सीसीटीव्ही फुटेज आणि तांत्रिक तपासाद्वारे चोरट्याचा माग काढत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:29 19-05-2025
