रत्नागिरी, दि. २४ मे २०२५: शिवसेना (उद्धव बाळासाहेब ठाकरे) नेते विनायक राऊत यांनी केंद्रीय रस्ते व वाहतूक मंत्री नितीन गडकरी यांना मुंबई-गोवा महामार्गाने प्रवास करून अधिकाऱ्यांच्या भ्रष्टाचाराची पाहणी करण्याचे आव्हान दिले आहे. रत्नागिरी येथे पत्रकार परिषदेत बोलताना राऊत यांनी प्रशासकांच्या हातात सत्ता देऊन लूटमार सुरू असल्याचा गंभीर आरोप केला. “गडकरींनी एकदा या महामार्गावरून प्रवास करावा, म्हणजे त्यांना अधिकाऱ्यांची टक्केवारी घेण्याची व्यस्तता लक्षात येईल,” असे ते म्हणाले.
राऊत यांनी राज्यातील कायदा व सुव्यवस्था पूर्णपणे कोलमडल्याचा दावा करत, गुन्हेगार पोलिसांना मित्र समजत असल्याची संतप्त प्रतिक्रिया व्यक्त केली. वैष्णवी हगवणे प्रकरणावर बोलताना त्यांनी राज्य प्रशासनाच्या कार्यक्षमतेवर प्रश्नचिन्ह उपस्थित केले. “राज्य सरकारच्या हातातून कायदा व सुव्यवस्था पूर्णपणे निसटली आहे,” अशी टीका त्यांनी केली. तसेच, मुंबई महानगरपालिका निवडणुकीसाठी आपण कधीही तयार असल्याचे त्यांनी ठणकावून सांगितले.
कोकणातील शेतकऱ्यांबाबत सत्ताधारी आणि मंत्र्यांना कोणतीही आपुलकी नसल्याचा थेट आरोप राऊत यांनी केला. “कोकणातील शेतकऱ्यांची कोणालाच पर्वा नाही,” असे ते म्हणाले. धुळे गेस्ट हाऊसमध्ये ५ कोटी रुपये सापडल्याच्या मुद्यावरूनही त्यांनी सत्ताधाऱ्यांवर टीकास्त्र सोडले. “समिती गेल्यानंतर पाहुण्यांना पैसे देण्याची प्रथा अत्यंत निंदनीय आहे,” असे त्यांनी नमूद केले. याशिवाय, छगन भुजबळ यांना मंत्रीपद मिळाल्याने त्यांची अस्वस्थता संपल्याचा टोलाही त्यांनी लगावला.
या पत्रकार परिषदेत राऊत यांनी राज्य सरकारच्या कारभारावर आणि कोकणातील प्रश्नांकडे दुर्लक्ष होत असल्याबाबत सडेतोड टीका केली. त्यांच्या या वक्तव्यामुळे राजकीय वर्तुळात खळबळ उडाली असून, यावर सत्ताधारी पक्ष काय प्रतिक्रिया देतो, याकडे सर्वांचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:30 24-05-2025
