रत्नागिरी, ता. २७ मे २०२५ : राज्यातील अकरावी ऑनलाइन प्रवेश प्रक्रियेतील तांत्रिक अडचणींचा ससेमिरा काही केल्या संपायला तयार नाही. सोमवार आणि मंगळवार हे दोन्ही दिवस विद्यार्थी आणि पालकांसाठी मनस्तापाचे ठरले. वेबसाईट वारंवार ‘हँग’ होत असल्याने अर्ज भरण्यासाठी आलेल्या विद्यार्थी, पालक आणि त्यांना मदत करणारे शिक्षकही वैतागले आहेत. तांत्रिक दुरुस्तीसाठी आठ दिवसांचा अवधी घेतल्यानंतरही हीच परिस्थिती कायम असल्याने, अनेक विद्यार्थ्यांना आज (मंगळवार) अर्ज भरता आला नाही.
तांत्रिक अडचणींचा डोंगर
अकरावी प्रवेशासाठी प्रत्यक्ष नोंदणी आणि पसंतीक्रम नोंदवण्याची प्रक्रिया २१ मे रोजी सुरू होणार होती. परंतु, तांत्रिक अडचणींमुळे वेबसाईटच ठप्प झाली होती. त्यानंतर सुधारित वेळापत्रकानुसार २६ मे पासून प्रक्रिया पुन्हा सुरू झाली. मात्र, पहिल्या दिवसापासूनच (२६ मे) विद्यार्थ्यांना अनेक समस्यांचा सामना करावा लागत आहे.
टप्पा-२ मध्ये अडथळे : अर्जातील पहिला टप्पा (पार्ट वन) ऑनलाइन भरल्यानंतर पुढील टप्प्यात (पार्ट टू) अडचणी येत आहेत.
ऑनलाइन शुल्क भरण्यास अडचण : प्रवेश अर्ज शुल्क भरण्यासाठीही वेबसाईटमध्ये वारंवार अडथळे येत आहेत.
महाविद्यालयांचे पर्याय न दिसणे : प्रवेश अर्जातील भाग दोन भरताना कनिष्ठ महाविद्यालयांची नावे आणि विषय साईटवर दिसत नसल्याने विद्यार्थ्यांना अडचणी येत आहेत.
अपूर्ण अर्ज : अनेक विद्यार्थ्यांचे अर्ज अपूर्ण राहिले आहेत.
या तांत्रिक अडचणींमुळे एका विद्यार्थ्याला अर्ज भरण्यासाठी साधारणतः अर्धा तास लागत आहे. अनेक मदत केंद्रांवर आणि कनिष्ठ महाविद्यालयांमध्ये प्रवेश इच्छुक विद्यार्थ्यांच्या रांगा लागल्याचे चित्र रत्नागिरीत दिसत आहे.
संताप आणि दिरंगाई
सुधारणेसाठी आठवडाभर वेळ घेतल्यानंतरही प्रक्रिया सुरळीत न झाल्याने विद्यार्थी, पालकांमध्ये तीव्र संताप व्यक्त होत आहे. ‘नवनिर्माण शिक्षणसंस्थेचे अध्यक्ष अभिजित हेगशेट्ये यांनी रत्नागिरी खबरदारशी बोलताना सांगितले की, आज (मंगळवारी) देखील हीच परिस्थिती कायम आहे. पहिल्या फेरीत प्रत्यक्ष नोंदणी आणि पर्याय नोंदणीची प्रक्रिया ३ जूनपर्यंत सुरू राहणार आहे, त्यानंतर गुणवत्ता यादी आणि प्रत्यक्ष प्रवेशाची फेरी सुरू होईल. मात्र, सध्याच्या परिस्थितीमुळे विद्यार्थ्यांचे शैक्षणिक नुकसान होण्याची भीती व्यक्त केली जात आहे. प्रशासनाने यावर तातडीने तोडगा काढण्याची मागणी जोर धरत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:25 27-05-2025
