रत्नागिरी : राष्ट्रीय अन्न सुरक्षा आणि पोषण अभियान अन्नधान्य पिके- पौष्टिक तृणधान्य- उप अभियान (श्री अन्न) अंतर्गत नाचणी व वरई पिकांची उत्पादकता वाढीसाठी व बियाणे बदलाचे महत्त्व विचारात घेता सुधारित वाणांच्या प्रसाराच्या दृष्टीने पीक प्रात्यक्षिकांचा कार्यक्रम राबविण्यात येत आहे. पीक प्रात्यक्षिक हे २५ एकर क्षेत्राच्या समूह प्रात्यक्षिक (क्लस्टर) धर्तीवर राबविण्यात येईल.
जास्तीत जास्त शेतकरी गट, शेतकरी उत्पादक कंपनी, कृषी क्षेत्रात काम करणारी सहकारी संस्था व बचत गट यांनी महाडिबिटी पोर्टलवर mahadbt.maharashtra.gov.in या संकेतस्थळावर २९ मे २०२५ पर्यंत अर्ज सादर करावेत. अधिक माहितीसाठी तालुका कृषी अधिकारी कार्यालयाशी संपर्क साधावा, असे आवाहन जिल्हा अधिक्षक कृषी अधिकारी शिवकुमार सदाफुले यांनी केले आहे.
कार्यक्रम १०० टक्के अनुदानावर असून शेतकरी गट / शेतकरी उत्पादक कंपनीद्वारे राबविला जाणार आहे. प्रात्यक्षिकामध्ये जिल्ह्यासाठी नाचणीचा ७२० हेक्टर व वरई पिकाचा ३० हेक्टरचा लक्षांक प्राप्त आहे. पीक प्रात्यक्षिक अंतर्गत लाभ घेण्यासाठी शेतकरी गट ३१ मार्च २०२४ पूर्वी नोंदणीकृत असावा (जसे आत्मा, महाराष्ट्र ग्रामीण जीवन्नोत्ती अभियान, राष्ट्रीय ग्रामीण जीवन्नोत्ती अभियान, महिला आर्थिक विकास महामंडळ, नाबार्ड). शेतकरी गट, शेतकरी उत्पादक कंपनी, कृषी क्षेत्रात काम करणारी सहकारी संस्था इत्यादींनी महाडीबिटी पोर्टलवर अर्ज करणे आवश्यक आहे.
प्रथम येणाऱ्यास प्रथम प्राधान्य या तत्वावर निवड केली जाईल. अॅग्रीस्टॅकवर नोंदणी असणे बंधनकारक असणार आहे. महाडीबीटी पोर्टलवर नोंदणी करताना नोंदणी करणाऱ्या गटातील संबंधित व्यक्तीचा अॅग्रीस्टॅक फार्मर आयडी वापरण्यात यावा.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
04:25 PM 28/May/2025
