रत्नागिरी, ०३ जून २०२५: रत्नागिरी शहरात पोलिसांनी अवैध दारू वाहतुकीवर मोठी कारवाई केली आहे. परटवणे ते साळवी स्टॉप रोडवर, परटवणे चौकात सोमवारी दुपारी पावणे चारच्या सुमारास पोलिसांनी एका रिक्षातून ८७ हजार रुपयांपेक्षा जास्त किमतीची दारू जप्त केली. या प्रकरणी रिक्षा चालकाला अटक करण्यात आली असून, त्याच्या विरोधात महाराष्ट्र दारूबंदी कायद्यान्वये गुन्हा दाखल करण्यात आला आहे.
मिळालेल्या माहितीनुसार, स्थानिक गुन्हे अन्वेषण शाखेचे पोलीस हवालदार प्रवीण कृष्णा खांबे यांना गुप्त माहिती मिळाली होती. या माहितीच्या आधारे त्यांनी परटवणे चौक परिसरात सापळा रचला. दुपारी ३.४५ वाजताच्या सुमारास, एमएच ०८ एक्यू ०७८३ या क्रमांकाची एक रिक्षा संशयास्पद स्थितीत आढळली. पोलिसांनी रिक्षा थांबवून तपासणी केली असता, त्यात मोठ्या प्रमाणात बिगरपरवाना दारूचा साठा आढळून आला.
जप्त केलेल्या दारूचा तपशील:
रॉयल स्टॅग दारू: १ बॉक्स (४८ बाटल्या, प्रत्येकी १९० रु. किंमत), एकूण किंमत ९,१२०/- रु.
डीएसपी ब्लॅक दारू: ३ बॉक्स (१४४ बाटल्या, प्रत्येकी १४० रु. किंमत), एकूण किंमत २०,१६०/- रु.
हायवर्ड व्हिस्की: १ बॉक्स (४८ बाटल्या, प्रत्येकी १२० रु. किंमत), एकूण किंमत ५,७६०/- रु.
मॅकडॉल नंबर १ व्हिस्की: २ बॉक्स (९६ बाटल्या, प्रत्येकी १६० रु. किंमत), एकूण किंमत १५,३६०/- रु.
रॉयल चॅलेंज व्हिस्की: १ बॉक्स (४८ बाटल्या, प्रत्येकी १९० रु. किंमत), एकूण किंमत ९,१२०/- रु.
ओल्ड मंक रम: १ बॉक्स (४८ बाटल्या, प्रत्येकी १४५ रु. किंमत), एकूण किंमत ६,९६०/- रु.
बॅगपायपर व्हिस्की: १ बॉक्स (४८ बाटल्या, प्रत्येकी १३० रु. किंमत), एकूण किंमत ६,२४०/- रु.
मॅकडॉल नं. १ रम: १ बॉक्स (४८ बाटल्या, प्रत्येकी १३५ रु. किंमत), एकूण किंमत ६,४८०/- रु.
रोमानो व्होडका (ऍपल फ्लेवर): २४ बाटल्या (प्रत्येकी १७० रु. किंमत), एकूण किंमत ४,०८०/- रु.
रोमानो व्होडका (क्लासिक फ्लेवर): २४ बाटल्या (प्रत्येकी १६० रु. किंमत), एकूण किंमत ३,८४०/- रु.
या सर्व दारूची एकूण किंमत ८७,१२०/- रुपये आहे.
या प्रकरणी पोलिसांनी रिक्षाचालक अनिल विष्णू वालकर (वय ३८, रा. पद्मावती वाटिका, मांडवी, रत्नागिरी) याला ताब्यात घेतले आहे. दारू वाहतुकीसाठी वापरलेली १,५०,०००/- रुपये किमतीची एमएच ०८ एक्यू ०७८३ क्रमांकाची रिक्षा देखील जप्त करण्यात आली आहे. जप्त केलेला एकूण मुद्देमाल २,३७,१२०/- रुपये इतका आहे.
रत्नागिरी शहर पोलिसांनी वालकर विरोधात महाराष्ट्र दारूबंदी कायदा कलम ६५ (अ) (ई) प्रमाणे गुन्हा दाखल केला आहे. या घटनेचा पुढील तपास रत्नागिरी पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:20 03-06-2025
