खेड, दि. ०४ जून २०२५ : खेड तालुक्यातील तिसंगी पिंपळवाडी येथील एका ३५ वर्षीय महिलेचा झाडावरून पडून दुर्दैवी मृत्यू झाला आहे. ही घटना २१ मे २०२५ रोजी रात्री १०:१५ वाजता रत्नागिरी येथील सिव्हिल हॉस्पिटलमध्ये घडली. गंभीर दुखापत झाल्याने तिला सुरुवातीला कळंबोली ग्रामीण रुग्णालयात दाखल करण्यात आले होते, परंतु पुढील उपचारासाठी रत्नागिरी येथे हलवल्यानंतर तिचा मृत्यू झाला.
काय घडलं?
भारती कृष्णा जाधव (वय ३५, रा. मदन भोसले यांच्याकडे भाड्याने, तिसंगी, पिंपळवाडी, ता. खेड, जि. रत्नागिरी) या २१ मे रोजी झाडावरून पडल्या. या अपघातात त्यांच्या डोक्याला आणि चेहऱ्याला गंभीर दुखापत झाली होती.
अपघातानंतर तातडीने त्यांना कळंबोली येथील ग्रामीण रुग्णालयात उपचारासाठी दाखल करण्यात आले. तेथील डॉक्टरांनी त्यांच्यावर प्राथमिक उपचार केले. परंतु, दुखापतीची गंभीरता लक्षात घेऊन अधिक उपचारांसाठी त्यांना १०८ ॲम्ब्युलन्सने रत्नागिरी येथील सिव्हिल हॉस्पिटलमध्ये पाठवण्यात आले.
रात्री १०:१५ वाजता भारती जाधव यांना सिव्हिल हॉस्पिटलमध्ये दाखल करण्यात आले. मात्र, तेथील वैद्यकीय अधिकारी डॉ. स्वराज धारगळकर यांनी तपासणी केली असता, उपचारापूर्वीच त्यांचा मृत्यू झाल्याचे घोषित केले.
या प्रकरणी खेड पोलीस ठाण्यात भारतीय न्यायसंहिता अधिनियम २०२३ च्या कलम १९४ नुसार आकस्मिक मृत्यूची नोंद (अमृ. क्र. ६१/२०२५) करण्यात आली आहे. घटनेची माहिती मिळताच पोलिसांनी पुढील तपास सुरू केला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:05 04-06-2025
