दापोली, दि. ०४ जून २०२५: दापोली तालुक्यातील लाडघर औदुंबरवाडी येथे घरामध्ये इनव्हर्टरचे काम करत असताना ६२ वर्षीय वृद्धाला विजेचा जोरदार धक्का लागून त्याचा दुर्दैवी मृत्यू झाला. ही घटना मंगळवारी, दि. ०३ जून २०२५ रोजी सायंकाळी ६:४५ वाजता घडली. त्याला तातडीने दापोलीतील भागवत हॉस्पिटलमध्ये दाखल करण्यात आले होते, परंतु डॉक्टरांनी त्याला मृत घोषित केले.
नेमकं काय घडलं?
सुनील मिजानंद होलम (वय ६२ वर्षे, रा. लाडघर औदुंबरवाडी, ता. दापोली, जि. रत्नागिरी) हे मंगळवारी सायंकाळी त्यांच्या लाडघर येथील राहत्या घरी इनव्हर्टर दुरुस्तीचे काम करत होते. काम करत असताना त्यांना अचानक विजेचा जोरदार धक्का लागला.
या घटनेमुळे त्यांना तातडीने दापोली येथील भागवत हॉस्पिटलमध्ये नेण्यात आले. सायंकाळी ६:४५ वाजताच्या सुमारास त्यांना रुग्णालयात दाखल केले असता, तेथील डॉक्टरांनी तपासणी करून सुनील होलम यांना मृत घोषित केले.
या घटनेने लाडघर औदुंबरवाडी परिसरात हळहळ व्यक्त होत आहे. दापोली पोलीस ठाण्यात या घटनेची आकस्मिक मृत्यू म्हणून नोंद करण्यात आली आहे (आमृ. क्र. ४१/२०२५ बी.एन.एस.एस १९४ प्रमाणे). या प्रकरणाचा पुढील तपास दापोली पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:11 04-06-2025
