खेड, रत्नागिरी, ०४ जून २०२५ : रत्नागिरी जिल्ह्यामध्ये अमली पदार्थांच्या तस्करीला आळा घालण्यासाठी जिल्हा पोलीस अधीक्षक, श्री. नितीन दत्तात्रय बगाटे आणि अपर पोलीस अधीक्षक श्रीमती. जयश्री गायकवाड यांनी दिलेल्या विशेष सूचनांनुसार, खेड पोलिसांनी धडाकेबाज कारवाई केली आहे. ३१ मे रोजी दाखल झालेल्या एका गांजा गुन्ह्याच्या तपासात मिळालेल्या माहितीच्या आधारे, खेड पोलिसांनी ०४ जून २०२५ रोजी एकाच रात्रीत दोन मोठ्या कारवाया करत २ किलोहून अधिक गांजा जप्त केला आणि दोन गांजा तस्करांना ताब्यात घेतले. खेड पोलीस ठाण्याची ही सलग तिसरी आणि महत्त्वपूर्ण कारवाई आहे.
३१ मे रोजीच्या गुन्ह्यातून मिळाली माहिती:
खेड पोलीस ठाण्यात ३१ मे २०२५ रोजी एन.डी.पी.एस. कायद्यांतर्गत (गुन्हा रजिस्टर नंबर १८३/२०२५, कलम 8C, 20B, 2B) एक गुन्हा दाखल करण्यात आला होता. या गुन्ह्याच्या तपासात अटक केलेल्या आरोपीकडून गांजा या अमली पदार्थाबाबत महत्त्वाची माहिती मिळाली होती. या माहितीच्या आधारेच खेड पोलिसांनी पुढील दोन मोठ्या कारवायांची तयारी केली.
पहिली कारवाई: भरणे नाका, खेड येथे दुचाकीवरील गांजा तस्कर जेरबंद
०४ जून २०२५ रोजी पोलीस निरीक्षक, खेड पोलीस ठाणे श्री. नितीन भोयर यांना जिल्हा/विभागीय गस्तीदरम्यान गुप्त माहिती मिळाली की, मुंबईतून एक व्यक्ती पांढऱ्या रंगाच्या दुचाकीवरून मुंबई-गोवा महामार्गावरील शहरांमध्ये गांजा विक्रीसाठी येणार आहे. या माहितीच्या आधारे श्री. भोयर आणि त्यांच्या पथकाने भरणे नाका, खेड येथे सापळा रचला.
गस्त घालत असताना, त्यांना संशयित आरोपी कमलेश उर्फ सुजल उर्फ रणजित विचारे (वय २०, रा. नालासोपारा, वसई, पालघर, सध्या रा. शिवतर दत्तवाडी, ता. खेड, जि. रत्नागिरी) हा पांढऱ्या दुचाकीवर दिसला. पोलिसांनी त्याला ताब्यात घेऊन तपासणी केली असता, त्याच्याकडून ०१ किलो ०४४ ग्रॅम वजनाचा ‘गांजा’ हा अंमली पदार्थ मिळून आला. पोलिसांनी गुन्ह्यात वापरलेली यामाहा R15 स्पोर्ट बाईक देखील जप्त केली आहे. या प्रकरणी खेड पोलीस ठाणे येथे तात्काळ गुन्हा रजिस्टर नंबर १८४/२०२५ NDPS ACT 8C, 20B, 2B अन्वये गुन्हा दाखल करण्यात आला आहे.
दुसरी कारवाई: खेड रेल्वे स्टेशनवर ‘तुतारी एक्सप्रेस’मधून येणारा तस्कर पकडला
त्याच दिवशी, ०४ जून २०२५ रोजी पोलीस निरीक्षक, खेड पोलीस ठाणे श्री. नितीन भोयर यांना दुसरी महत्त्वाची माहिती मिळाली. तुतारी एक्सप्रेस ट्रेनमधून अंदाजे २०-२५ वयोगटाचा एक तरुण हिरव्या रंगाच्या बॅगेत गांजा विक्रीसाठी घेऊन येणार असल्याची माहिती त्यांना मिळाली.
या माहितीच्या आधारे श्री. नितीन भोयर आणि त्यांच्या पथकाने खेड रेल्वे स्टेशन येथे पाळत ठेवली. काही वेळाने त्यांना संशयित आरोपी रवींद्र प्रेमचंद खेरालिया (वय २५, रा. उत्तर प्रदेश राज्य, सध्या रा. रूम नंबर १०१, मुस्कान अपार्टमेंट, टाकी रोड, गावदेवी मंदिर, आंबेडकर नगर, मीरा रोड, ठाणे जिल्हा) हा मिळून आला. पोलिसांनी त्याच्याकडील हिरव्या रंगाच्या बॅगची तपासणी केली असता, त्यात ०१ किलो ०२२ ग्रॅम वजनाचा ‘गांजा’ हा अंमली पदार्थ आढळून आला. या प्रकरणी खेड पोलीस ठाणे येथे गुन्हा रजिस्टर नंबर १८५/२०२५ NDPS ACT 8C, 20B, 2B अन्वये गुन्हा दाखल करण्यात आला आहे.
एकूण २ किलो ०६६ ग्रॅम गांजा जप्त, ड्रग्ज कार्टेलच्या म्होरक्याचा शोध सुरू:
०४ जून २०२५ रोजी दाखल झालेल्या या दोन्ही गुन्ह्यांतील आरोपींना अटक करण्यात आली आहे. या दोन कारवायांमध्ये पोलिसांनी एकूण २ किलो ०६६ ग्रॅम ‘गांजा’ हा अंमली पदार्थ जप्त केला आहे. प्राथमिक तपासात असे निष्पन्न झाले आहे की, हे दोन्ही आरोपी एकाच ड्रग्ज कार्टेलशी संबंधित आहेत. त्यांना पोलीस कोठडी मिळवण्यासाठी आज मा. न्यायालयात हजर करण्यात येत आहे. खेड पोलीस या ड्रग्ज कार्टेलच्या मुख्य सूत्रधाराचा (हेड) शोध घेऊन त्यालाही अटक करण्याचे प्रयत्न करत आहेत.
यशस्वी कामगिरी करणारे पोलीस पथक:
मा. पोलीस अधीक्षक, रत्नागिरी आणि अपर पोलीस अधीक्षक, रत्नागिरी यांच्या मार्गदर्शनाखाली खेड पोलीस ठाण्याचे प्रभारी पोलीस निरीक्षक श्री. नितीन भोयर, स.पो.नि. श्री. संजय पाटील, पो.कॉ/१३१५ श्री. रूपेश जोगी, पो.कॉ/६१३ श्री. सुमित नवघरे, पो.कॉ/८१५ श्री. रोहित जोयशी, पो.कॉ/१२९१ श्री. अजय कडू, पो.कॉ/१०१० श्री. राम नागुलवार, पो.कॉ/९६२ श्री. वैभव ओहोळ आणि पो.हवा/३३८ श्री. विक्रम पाटील (स्थानिक गुन्हे अन्वेषण शाखा, रत्नागिरी) यांनी ही कौतुकास्पद कामगिरी केली आहे.
रत्नागिरी जिल्ह्यातून अमली पदार्थांचे समूळ उच्चाटन करण्यासाठी पोलीस प्रशासन कटिबद्ध असून, अशा प्रकारच्या कारवाया भविष्यातही सुरूच राहतील, असे पोलिसांनी स्पष्ट केले आहे. नागरिकांनीही संशयित हालचालींची माहिती पोलिसांना देऊन सहकार्य करण्याचे आवाहन करण्यात आले आहे.
