रत्नागिरी : भारताचे प्रेरणास्थान छत्रपती शिवाजी महाराज यांचा इतिहास केंद्रीय माध्यमिक शिक्षण मंडळाच्या (CBSE) अभ्यासक्रमात केवळ ६८ शब्दांत आणि ११ ओळींत शिकवणे हे महाराजांच्या शौर्याचा अपमान आहे, असा तीव्र आक्षेप घेत हिंदु जनजागृती समितीने आज निवासी उपजिल्हाधिकारी श्री. अजय सूर्यवंशी यांना निवेदन दिले. सीबीएसई अभ्यासक्रमात छत्रपती शिवाजी महाराजांचा स्वतंत्र, सविस्तर आणि सन्मानपूर्वक समावेश तात्काळ करण्याची मागणी करण्यात आली. यावेळी शैलेश बेर्डे, ज्ञानेश्वर राऊत, निलेश आखाडे, सौ. सायली बेर्डे, मुकेश माळी, नितीन गांगण, गणपत निवळकर, गोविंद भारद्वाज, संजय जोशी यांच्यासह हिंदु जनजागृती समितीचे पदाधिकारी उपस्थित होते.
सद्यस्थिती आणि मागणी:
अपमानास्पद उल्लेख: समितीच्या म्हणण्यानुसार, सीबीएसईच्या इयत्ता चौथी ते बारावीपर्यंतच्या अभ्यासक्रमात छत्रपती शिवाजी महाराजांचा उल्लेख केवळ ६८ शब्दांत आणि ११ ओळींत करण्यात आला आहे. हा महाराजांच्या पराक्रमाचा आणि हिंदवी स्वराज्य संकल्पाचा अवमान आहे.
मंत्र्यांची घोषणा, पण कृती नाही: शालेय शिक्षणमंत्री मा. दादा भुसे यांनी सीबीएसई अभ्यासक्रमात छत्रपती शिवाजी महाराजांच्या देदीप्यमान इतिहासाचा समावेश करण्याची घोषणा केली आहे. तसेच, सीबीएसईचा अभ्यासक्रम राज्यासाठी लागू करण्याविषयीही त्यांनी म्हटले आहे. मात्र, प्रत्यक्षात सीबीएसईच्या अभ्यासक्रमात महाराजांच्या लढाया, राज्यकारभार, धर्मनिष्ठा, आरमार, गनिमी कावा यांचा उल्लेखही नसल्याचे समितीने निदर्शनास आणले.
मागील अनुभव: यापूर्वी काँग्रेस सरकारच्या काळात राष्ट्रीय शैक्षणिक संशोधन आणि प्रशिक्षण परिषदेच्या (NCERT) इयत्ता ७ वीच्या ‘हमारे अतीत’ या पुस्तकात केवळ ६ ओळींचा अवमानकारक इतिहास होता. हिंदु जनजागृती समितीच्या तीव्र विरोधामुळे तो बदलावा लागला होता. गोवा सरकारलाही याच कारणामुळे इतिहासाचे पुस्तक मागे घेऊन नवीन प्रकरण समाविष्ट करावे लागले होते.
समितीची प्रमुख मागणी:
समितीने म्हटले आहे की, विद्यार्थ्यांना ग्रीस, रोम, चीन, अमेरिका आदी परदेशी राजवटी, सम्राट व युद्धांचा अभ्यास शिकवला जातो, मात्र स्वतःच्या देशातील महान राजाविषयी अपुरे आणि तुटक ज्ञान दिले जाते, हे खेदजनक आहे. जगभरातील विविध देशांच्या सैन्यदलांमध्ये अफझलखानवध, गनिमी कावा यांसारख्या छत्रपती शिवाजी महाराजांच्या युद्धनीतीचा अभ्यास केला जातो, तर तोच इतिहास भारतात का शिकवला जात नाही, हा प्रश्न अनुत्तरित राहतो.
त्यामुळे, बालभारतीच्या इयत्ता ४ थी व ७ वीच्या इतिहास पुस्तकांतील सुसंगत व सप्रमाण मजकुराचा अभ्यास करून सीबीएसईच्या इतिहास अभ्यासक्रमात इयत्ता ६ वी ते १० वीपर्यंत छत्रपती शिवाजी महाराजांचे जीवनकार्य, युद्धनीती, राज्यकारभार, धर्मनिष्ठा आणि राष्ट्रनिष्ठा यांचा समावेश असलेला पूर्ण व तथ्याधारित अभ्यासक्रम तात्काळ तयार करावा, अशी मागणी हिंदु जनजागृती समितीने केली आहे. या मागणीवर सरकार काय पाऊल उचलते हे पाहणे महत्त्वाचे ठरेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:43 06-06-2025
