मुंबई, ०९ जून २०२५: mumbra train accident मुंबईजवळील दिवा आणि मुंब्रा रेल्वेस्थानकांदरम्यान एक भीषण आणि हृदयद्रावक रेल्वे अपघात घडला आहे. कसारा येथून छत्रपती शिवाजी महाराज टर्मिनसच्या दिशेने जाणाऱ्या लोकल रेल्वेगाडीतून पडून पाच प्रवाशांचा मृत्यू झाला असून, तिघे गंभीर जखमी झाले आहेत. लोंबकळत प्रवास करणाऱ्या प्रवाशांना समोरून जाणाऱ्या पुष्पक एक्सप्रेसचा धक्का लागल्याने ही दुर्घटना घडल्याचे प्रत्यक्षदर्शींनी सांगितले.
नेमके काय घडले?
आज दुपारी कसारा येथून निघालेली सीएसएमटी दिशेने जाणारी लोकल मुंब्रा रेल्वे स्थानकाजवळ आली असता, समोरून लखनौला जाणारी पुष्पक एक्सप्रेस येत होती. लोकलमधील प्रचंड गर्दीमुळे अनेक प्रवासी डब्याच्या दरवाज्यांमध्ये लोंबकळत उभे होते. दोन्ही रेल्वेगाड्या एकमेकांच्या बाजूने जात असताना, लोकलच्या दरवाजात उभे असलेले प्रवासी पुष्पक एक्सप्रेसला घासले गेले. त्यांच्या बॅगा एक्सप्रेसच्या बाहेरील भागावर आदळल्या आणि बघता बघता आठ प्रवासी धावत्या लोकल ट्रेनमधून खाली कोसळले.
या दुर्दैवी घटनेत पाच प्रवाशांचा जागीच मृत्यू झाला. तर इतर तिघे गंभीर जखमी झाले असून, त्यांची प्रकृती चिंताजनक आहे. जखमींवर कळवा येथील ठाणे महापालिकेच्या छत्रपती शिवाजी महाराज रुग्णालयात उपचार सुरू आहेत.
तात्काळ मदत आणि पोलिसांचा तपास
रेल्वेतून प्रवासी पडल्याचे पाहून काही प्रवाशांनी तात्काळ रेल्वे सुरक्षा दलाला (RPF) आणि लोहमार्ग पोलिसांना माहिती दिली. माहिती मिळताच, मुंब्रा रेल्वे सुरक्षा दल आणि लोहमार्ग पोलीस दलाचे अधिकारी तातडीने घटनास्थळी दाखल झाले. रेल्वे रुळांवर रक्ताचा सडा पडलेला होता, जो या अपघाताची भीषणता दर्शवत होता. जखमींना आणि मृतांना तात्काळ रुग्णालयात हलवण्याचे काम युद्धपातळीवर करण्यात आले.
पुष्पक एक्सप्रेसचा संबंध नाही
काही वृत्तवाहिन्यांनी सुरुवातीला पुष्पक एक्सप्रेसमधील प्रवासी पडल्याचा दावा केला होता. मात्र, रेल्वे प्रशासनाने हा दावा फेटाळून लावला आहे. रेल्वेने स्पष्ट केले आहे की, पुष्पक एक्सप्रेसमधून कोणताही प्रवासी पडलेला नाही आणि या अपघाताशी पुष्पक एक्सप्रेसचा थेट संबंध नाही. लोकल ट्रेनमधील गर्दी आणि लोंबकळत प्रवास हेच या दुर्घटनेचे मुख्य कारण असल्याचे सांगितले जात आहे.
या भीषण अपघातामुळे मुंबईतील रेल्वे प्रवासातील सुरक्षिततेचा प्रश्न पुन्हा एकदा ऐरणीवर आला आहे. प्रशासनाने या घटनेची गंभीर दखल घेऊन अशा दुर्घटना टाळण्यासाठी योग्य उपाययोजना कराव्यात अशी मागणी प्रवाशांकडून होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:59 09-06-2025
