रत्नागिरी : केंद्रीय मंत्री नारायण राणे यांनी मनसे नेते प्रकाश महाजन यांना त्यांच्या (महाजन यांच्या) वक्तव्याबद्दल जोरदार प्रत्युत्तर दिले आहे. एका मुलाखतीदरम्यान प्रकाश महाजन यांनी राज ठाकरे आणि नारायण राणे यांच्याबद्दल केलेल्या टिप्पणीला राणे यांनी आपल्या फेसबुक पोस्टद्वारे सडेतोड उत्तर दिले आहे.
“राज आणि माझे संबंध बोलण्याच्या पलीकडचे”
नारायण राणे यांनी आपल्या पोस्टमध्ये म्हटले आहे की, “टीव्ही-९ च्या पत्रकाराने प्रकाश महाजन यांची मुलाखत घेतली. त्यात त्यांनी जे अकलेचे तारे तोडले त्याला माझे हे उत्तर आहे. श्रीयुत राज आणि माझ्याबद्दल (नारायण राणे) आपण जे बोललात त्याबद्दल मला काही बोलायचे नाही. श्रीयुत राज ठाकरे आणि माझे संबंध हे बोलण्याच्या पलीकडील आहेत.” यातून राणे यांनी राज ठाकरे यांच्याशी असलेले त्यांचे संबंध किती दृढ आहेत, हे अधोरेखित केले.
“प्रकाश महाजन कोण? तुमची कुवत नाही!”
प्रकाश महाजन यांच्या राजकीय आणि सामाजिक योगदानावर प्रश्नचिन्ह उपस्थित करत राणे यांनी त्यांना चांगलेच फैलावर घेतले. “प्रकाश महाजन कोण? राजकारणात, समाजकारणात, विधायक क्षेत्रात आपले योगदान काय? कुठल्या एखादया पक्षात एक पद मिळाले म्हणून तोंडाचा, जिभेचा उपयोग करू नये एवढी तुमची कुवत नाही,” असे राणे यांनी म्हटले आहे. यातून त्यांनी महाजन यांची राजकीय कारकीर्द आणि त्यांची पात्रता यावर थेट हल्ला चढवला.
“नितेश, निलेशची वैचारिक उंची जनतेने ठरवली आहे”
नारायण राणे यांनी आपले पुत्र नितेश आणि निलेश यांच्या राजकीय उंचीवरही प्रकाश टाकला. ते म्हणाले, “श्री. नितेश राणे, कॅबिनेट मंत्री, महाराष्ट्र राज्य यांनी आपली वैचारिकता, बुद्धिमत्ता, जनमानसातील प्रतिमा या वयात सिद्ध केली आहे. श्रीयुत निलेश, नितेश व नारायण राणे हे दूरच, वैचारिक उंची तुम्ही ठरवणारे कोण? आमची वैचारिक उंची जनतेने ठरविली आहे. नितेश जनतेतून तीन वेळा निवडून आला आहे. आपण किती वेळा निवडून आलात?” या प्रश्नाने त्यांनी महाजन यांच्या निवडून येण्याच्या क्षमतेवरच बोट ठेवले.
“लायकीपेक्षा जास्त बोललात तर उलट्या करायला लावेन!”
शेवटी, नारायण राणे यांनी प्रकाश महाजन यांना अत्यंत कठोर शब्दात इशारा दिला आहे. “आपण राणेंच्या रस्त्यात आलाच आहात तर आपणांस योग्य रस्ता दाखविण्याचे काम मी जरूर करेन. आपण निलेश, नितेशना निष्ठा शिकविण्याची गरज नाही. तुमच्यासारख्या दीड दमडीच्या लोकांकडून अभिप्रेत नाही. प्रकाश महाजन तुम्ही लायकी पेक्षा जास्त बोलत आहात. परत बोललात तर उलट्या करायला लावेन,” अशा स्पष्ट आणि आक्रमक शब्दात राणे यांनी महाजन यांना भविष्यात आपल्याबद्दल बोलल्यास त्याचे गंभीर परिणाम होतील, असा थेट इशारा दिला आहे.
या फेसबुक पोस्टमुळे राजकीय वर्तुळात चांगलीच खळबळ उडाली असून, प्रकाश महाजन यावर काय प्रतिक्रिया देतात, याकडे सर्वांचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:13 10-06-2025
