रत्नागिरी, संगमेश्वर: मुंबई-गोवा राष्ट्रीय महामार्ग क्रमांक ६६ वर जाखमाता मंदिरासमोर, कसबा येथे ३१ मे २०२५ रोजी दुपारी २.३० वाजण्याच्या सुमारास भीषण अपघात घडला. दारूच्या नशेत (किंवा गाडी चालवण्यास अनफिट असताना) दुचाकी चालवणाऱ्या चालकाने समोरून येणाऱ्या अशोक लेलँड दोस्त गाडीला धडक दिल्याने हा अपघात झाला. या अपघातात दुचाकीस्वार गंभीर जखमी झाला असून दोन्ही वाहनांचे मोठे नुकसान झाले आहे.
याप्रकरणी संगमेश्वर पोलीस ठाण्याचे पोलीस उपनिरीक्षक प्रशांत संभाजी शिंदे (वय ५६) यांनी फिर्याद दिली आहे. त्यानुसार, आरोपी दिनेश गजानन पांचाळ (वय ५०) याच्या विरोधात ९ जून २०२५ रोजी दुपारी १ वाजता गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी दिनेश पांचाळ हा आपली हिरो होंडा युनिकॉर्न (एम.एच.०८ बी.डी. ७९६०) दुचाकी चिपळूणकडून संगमेश्वरकडे घेऊन जात होता. जाखमाता मंदिराच्या अलीकडे आल्यावर, तो गाडी चालवण्यास अनफिट असतानाही अतिवेगाने आणि बेदरकारपणे गाडी चालवत होता. रस्त्याची विशिष्ट परिस्थिती लक्षात न घेता, त्याला चक्कर आली आणि त्याची गाडी चुकीच्या बाजूने जाऊन समोरून येणाऱ्या अशोक लेलँड दोस्त (एम.एच.०९ ईएम ४४७८) गाडीला धडकली.
या अपघातात दुचाकीस्वार दिनेश पांचाळ याला लहान आणि मोठ्या स्वरूपाच्या दुखापती झाल्या आहेत. तसेच, दोन्ही वाहनांचेही मोठे नुकसान झाले आहे.
संगमेश्वर पोलिसांनी गु.र.नं. ८५/२०२५, भारतीय न्यायसंहिता अधिनियम २०२३ चे कलम २८१, १२५(अ), १२५(ब) आणि मोटर वाहन कायद्याचे कलम १८४/१८५ प्रमाणे गुन्हा दाखल केला आहे. दारूच्या नशेत वाहन चालवणाऱ्यांवर कठोर कारवाई करण्याचे संकेत पोलिसांनी दिले आहेत. नागरिकांनी वाहन चालवताना सुरक्षिततेचे नियम पाळावेत आणि दारू पिऊन गाडी चालवू नये असे आवाहन पोलिसांनी केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:13 10-06-2025
