रत्नागिरी, १2 जून २०२५: कोकणातील दळणवळण व्यवस्था अधिक भक्कम करण्याच्या उद्देशाने, मांडवा, माझगाव ते रत्नागिरी आणि मालवणदरम्यान सागरी ‘रो-रो’ (रोल-ऑन/रोल-ऑफ) सेवा लवकरच सुरू करण्यात येणार आहे. मत्स्य व बंदर विकासमंत्री नीतेश राणे यांनी नुकतीच ही घोषणा केली असून, या प्रकल्पाने चांगला वेग घेतला आहे. मात्र, पावसाळ्यात या सेवेला काही आव्हानांचा सामना करावा लागणार असल्याची माहिती प्रादेशिक बंदर विभागाच्या पाहणीतून समोर आली आहे.
प्रकल्पाला गती: कॅप्टनकडून बंदरांची पाहणी
मुख्यमंत्री देवेंद्र फडणवीस यांच्या नेतृत्वाखालील महायुती सरकार रस्ते, रेल्वेसोबतच जलवाहतुकीलाही प्राधान्य देत आहे. याच धोरणाचा एक भाग म्हणून ही महत्त्वाकांक्षी ‘रो-रो’ सेवा सुरू केली जात आहे. ज्या एजन्सीचे जहाज निश्चित केले आहे, त्या जहाजाचे कॅप्टन व अन्य टीमने नुकतीच भगवती बंदर (रत्नागिरी) आणि जयगड बंदरांची पाहणी केली. प्रवाशांची आणि वाहनांची सुरक्षितता, स्थिर जेटीची उपलब्धता, प्रवाशांना जहाजावर चढवणे आणि उतरवणे यासाठीच्या व्यवस्था अशा अनेक महत्त्वाच्या बाबींचा या पाहणीत विचार करण्यात आला.
तीन ते पावणेपाच तासांत कोकण प्रवास
मंत्री नीतेश राणे यांनी दिलेल्या माहितीनुसार, येत्या गणेशोत्सवापर्यंत मांडवा आणि माझगाव येथून ‘रो-रो’ जलसेवा सुरू करण्याचा प्रयत्न आहे. या सेवेमुळे माझगाव येथून थेट रत्नागिरीपर्यंत अवघ्या तीन तासांत पोहोचता येणार आहे, तर मालवण आणि विजयदुर्गापर्यंत साडेचार ते पावणेपाच तासांत पोहोचणे शक्य होईल. ही जलसेवा एकावेळी जवळपास १०० गाड्या आणि ५०० प्रवासी घेऊन जाईल. यासाठी लागणारी मोठी बोट (क्रूझ) भारतात दाखल झाली असून, मुख्यमंत्री फडणवीस लवकरच तिची पाहणी करतील. गणेशचतुर्थी ऑगस्ट महिन्याच्या शेवटच्या आठवड्यात असल्याने, त्यापूर्वी ही सेवा सुरू करण्यासाठी वेगाने काम सुरू आहे.
पावसाळ्यातील आव्हाने आणि सुरक्षा विषयक चिंता
एकीकडे हा प्रकल्प वेगाने मार्गी लागत असताना, दुसरीकडे पावसाळ्यात या सेवेसमोरील आव्हानेही समोर आली आहेत. प्रादेशिक बंदर विभागाच्या पाहणीमध्ये काही अडचणी निदर्शनास आल्या आहेत. पावसाळ्यात एवढ्या जलदगतीने आवश्यक असणाऱ्या पायाभूत सुविधांची उभारणी, सुरक्षा व्यवस्था, प्रवासी सुरक्षा आणि वाहने उतरवण्यासाठी स्थिर जेटी उपलब्ध करणे आव्हानात्मक असल्याने या ‘रो-रो’ सेवेला काही अडथळ्यांशी सामना करावा लागण्याची शक्यता आहे. या अडचणींवर मात करून ही सेवा निर्धारित वेळेत सुरू होते का, हे पाहणे महत्त्वाचे ठरेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:41 13-06-2025
