रत्नागिरी : महिलांसाठी असलेल्या विविध कायद्यांविषयी महिलांना माहिती देणे आणि त्यांना सक्षम बनवणे यासाठी भारत सरकार पुरस्कृत मिशन शक्तीअंतर्गत सबल आणि महिला सक्षमीकरण केंद्राद्वारे सखी सेंटर ने रत्नागिरी जिल्ह्यात जनजागृतीचे २७ कार्यक्रम घेतले. त्यामध्ये १ हजार ३९९ लोकांनी सहभाग घेतला.
महिला सक्षमीकरणासाठी २१ जून ते ४ ऑक्टोबरपर्यंत जनजागृती अभियानांतर्गत रत्नागिरीतील सखी सेंटरमार्फत विविध विषयांशी निगडित जनजागृती कार्यक्रम राबवण्यात आले. या अभियानांतर्गत सखी सेंटरतर्फे जिल्ह्यातील लांजा, राजापूर, देवरूख, रत्नागिरी, गुहागर तालुक्यात तसेच प्रभागसंघ शिरगाव, कोचरी शाळा, गोगटे जोगळेकर महाविद्यालय, सीताई पार्क महिला बचतगट, कुर्णे महिला बचतगट, राई महिला बचतगट, भराडीण प्रभाग संघ कासारवेली, अंगणवाड्या, लांजा पोलीस ठाणे, खावडी शाळा-लांजा, प्राथमिक आरोग्य केंद्र हेदवी-गुहागर, सिव्हिल हॉस्पिटल-रत्नागिरी, परकार हॉस्पिटल, रहाटाघर-रत्नागिरी, महिलाश्रम-लांजा, आजी-आजोबांचा गाव कोंड्ये, लांजा, गोळप ग्रामपंचायत, मिळंद-राजापूर, भाट्ये ग्रामपंचायत, समाजकल्याण महिला वसतिगृह या ठिकाणी पोक्सो, महिलांविषयी कायदे, महिला सक्षमीकरण केंद्र, सखी वन स्टॉप सेंटर, कौटुंबिक हिंसाचार कायदा, सखी निवास, पीसीपीएनडीटी ॲक्ट, गुड टच बॅड टच, महिला सक्षमीकरण इत्यादी विषयांवर कार्यक्रम घेऊन माहिती देण्यात आली.
हे अभियान सखी सेंटरच्या केंद्र प्रशासक अश्विनी मोरे, समुपदेशक स्वरा मयेकर, पॅरा मेडिकल ऑफिसर सुप्रिया शितप, आयटी स्टाफ प्रियांका बोरकर यांनी या उपक्रमात मेहनत घेतली व अभियान यशस्वी केले.
महिला सक्षमीकरणासाठी आयोजित या अभियानाचा मुख्य उद्देश म्हणजे जास्तीत जास्त महिलांपर्यंत पोहोचून त्यांना महिला सक्षमीकरणाविषयी माहिती देणे, महिलांसाठी असलेल्या विविध कायद्यांविषयी महिलांना माहिती देणे व त्यांना सक्षम बनवणे हा होता, असे सखी सेंटरतर्फे सांगण्यात आले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:37 14-10-2024
