कल्याण-डोंबिवली, १४ जून २०२५: कल्याण डोंबिवली महानगरपालिका (KDMC) प्रशासकीय, वैद्यकीय, लेखा, अभियांत्रिकी, अग्निशमन, विधी, क्रीडा आणि उद्यान सेवा यांसारख्या विविध क्षेत्रांतील गट ‘क’ आणि गट ‘ड’ मधील एकूण ४९० रिक्त जागांसाठी मोठी भरती करत आहे. या भरतीसाठी ऑनलाइन अर्ज प्रक्रिया सुरू झाली असून, इच्छुक उमेदवारांना ३ जुलै २०२५ रोजी रात्री ११.५५ वाजेपर्यंत अर्ज सादर करण्याची अंतिम मुदत आहे.
भरतीसंबंधी महत्त्वाच्या तारखा:
- अर्ज सुरू होण्याची तारीख: १० जून २०२५
- अर्ज सादर करण्याची अंतिम तारीख: ३ जुलै २०२५ (रात्री ११:५५ पर्यंत)
- परीक्षा शुल्क भरण्याची अंतिम तारीख: ३ जुलै २०२५
- परीक्षेचे प्रवेशपत्र: परीक्षेच्या ७ दिवस आधी उपलब्ध होतील.
- परीक्षेची तारीख: लवकरच KDMC च्या अधिकृत वेबसाइटवर जाहीर केली जाईल.
पदांचा तपशील आणि आवश्यक पात्रता:
ही भरती विविध प्रकारच्या पदांसाठी आहे, ज्यात प्रशासकीय सेवा, निमवैद्यकीय सेवा, लेखा सेवा, अभियांत्रिकी सेवा, अग्निशमन सेवा, विधी सेवा, क्रीडा सेवा, उद्यान सेवा इत्यादींचा समावेश आहे. प्रत्येक पदासाठीची सविस्तर शैक्षणिक पात्रता आणि इतर आवश्यक गोष्टी लवकरच प्रकाशित होणाऱ्या सविस्तर जाहिरातीमध्ये उपलब्ध असतील. उमेदवारांनी अर्ज करण्यापूर्वी ती जाहिरात काळजीपूर्वक वाचावी. पदासाठी आवश्यक असलेली अर्हता किंवा अनुभव शिथिल केला जाणार नाही.
अर्ज शुल्क:
- खुला प्रवर्ग: रु. १,०००/-
- मागास प्रवर्ग आणि अनाथ प्रवर्ग: रु. ९००/-
- माजी सैनिक आणि दिव्यांग माजी सैनिक: परीक्षा शुल्क माफ.
महत्वाचे: अर्ज शुल्क केवळ ऑनलाईन पद्धतीनेच भरायचे आहे. जर उमेदवाराला एकापेक्षा जास्त पदांसाठी अर्ज करायचा असेल, तर प्रत्येक पदासाठी स्वतंत्र अर्ज सादर करून त्यासाठी स्वतंत्र परीक्षा शुल्क भरणे बंधनकारक असेल.
अर्ज कसा कराल?
इच्छुक उमेदवारांनी कल्याण डोंबिवली महानगरपालिकेच्या अधिकृत वेबसाइट www.kdmc.gov.in वर जाऊन ऑनलाईन अर्ज करायचा आहे. अर्ज भरण्यासाठीची थेट लिंक https://cdn3.digialm.com// ही आहे.
निवड प्रक्रिया:
उमेदवारांची निवड प्रक्रिया खालीलप्रमाणे असेल:
- ऑनलाईन परीक्षा: परीक्षा ऑनलाईन पद्धतीने घेतली जाईल. परीक्षेचे ठिकाण, दिनांक आणि वेळ उमेदवारांना ईमेल किंवा SMS द्वारे कळवली जाईल. तसेच, KDMC च्या अधिकृत संकेतस्थळावरही ही माहिती प्रसिद्ध केली जाईल. त्यामुळे उमेदवारांनी वेळोवेळी वेबसाइटला भेट देणे आवश्यक आहे.
- गुणवत्तेवर आधारित निवड: या भरतीसाठी कोणतीही मुलाखत घेतली जाणार नाही. उमेदवारांची निवड पूर्णपणे ऑनलाईन परीक्षेत मिळालेल्या गुणांच्या आधारावर केली जाईल.
- पात्रता गुण: गुणवत्ता यादीत स्थान मिळवण्यासाठी खुल्या प्रवर्गातील उमेदवारांना एकूण गुणांच्या किमान ५०% आणि मागासवर्गीय प्रवर्गातील उमेदवारांना किमान ४५% गुण मिळवणे आवश्यक आहे.
- कागदपत्र पडताळणी: निवड झालेल्या उमेदवारांना कागदपत्रे पडताळणीसाठी (Document Verification) प्रत्यक्ष हजर राहावे लागेल.
- गुणांची यादी: परीक्षेनंतर पात्र उमेदवारांना मिळालेल्या सामान्यीकरण (Normalization) गुणांची यादी कल्याण डोंबिवली महानगरपालिकेच्या अधिकृत संकेतस्थळावर प्रसिद्ध करण्यात येईल.
मदतीसाठी संपर्क:
अर्ज भरताना काही तांत्रिक अडचणी आल्यास, उमेदवारांनी टी.सी.एस. हेल्पलाईन नंबर ०२२-६१०८७५१९ वर संपर्क साधावा. जाहिरातीबद्दल इतर काही प्रश्न असल्यास, ०२५१-२३०३०६० या नंबरवर (सोमवार ते शनिवार, सकाळी १०:०० ते सायंकाळी ६:००) संपर्क साधू शकता. तसेच, kdmcrecruitment2025@gmail.com या ईमेल आयडीवर मेल करूनही माहिती मिळवता येईल.
कल्याण डोंबिवली महानगरपालिकेत नोकरी मिळवू इच्छिणाऱ्या तरुणांसाठी ही एक उत्तम संधी आहे. इच्छुकांनी अंतिम मुदतीपूर्वी अर्ज करून या संधीचा लाभ घ्यावा.
