राजापूर शहरात दि, १८ जून २०२५ रोजी रात्री उशिरा पोलिसांनी गोवा बनावटीची दारू बेकायदेशीरपणे विक्रीसाठी बाळगणाऱ्या एका तरुणाला ताब्यात घेतले आहे. राजापूर एसटी डेपोबाहेर ही कारवाई करण्यात आली.
पोलिसांनी दिलेल्या माहितीनुसार, १८ जून २०२५ रोजी रात्री ११.३० वाजण्याच्या सुमारास राजापूर एसटी डेपोबाहेरील एका टपरीच्या आडोशाला प्रथमेश विश्वनाथ पवार (वय २०, रा. दिवटेवाडी, ता. राजापूर) हा गोवा बनावटीची दारू विक्रीसाठी बाळगून असल्याची माहिती राजापूर पोलिसांना मिळाली.
मिळालेल्या माहितीनुसार, पोलिसांनी तात्काळ छापा टाकून प्रथमेश पवारला ताब्यात घेतले. त्याच्याकडून १७०० रुपये किमतीचा रिझर्व्ह सेव्हेन कंपनीच्या गोवा बनावटीच्या दारूचा एक बॉक्स जप्त करण्यात आला. या बॉक्समध्ये ७५० मिली मापाच्या ५ सीलबंद बाटल्या होत्या, ज्या प्रत्येकी ३४० रुपये किमतीच्या आहेत.
या प्रकरणी पोलीस शिपाई संदीप रामचंद्र कंभार (पोशि/१०९२) यांनी राजापूर पोलीस ठाण्यात तक्रार दाखल केली. त्यानुसार, १९ जून २०२५ रोजी पहाटे १२:४५ वाजता महाराष्ट्र दारूबंदी कायदा कलम ६५(ई) नुसार गुन्हा (गु.र.नं. १२०/२०२५) दाखल करण्यात आला आहे.
अवैध दारू विक्री आणि वाहतुकीवर नियंत्रण ठेवण्यासाठी पोलीस प्रशासन सक्रिय असून, नागरिकांनी अशा बेकायदेशीर कृत्यांपासून दूर राहावे, असे आवाहन करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:16 20-06-2025
