रत्नागिरी: लायनेस्टिक वर्ष २०२४-२५ लायन्स क्लब ऑफ रत्नागिरीसाठी अत्यंत यशस्वी ठरले आहे. या वर्षात क्लबने सेवाकार्यात नवे विक्रम प्रस्थापित करत प्रांत आणि बहुप्रांतात आपले नाव उंचावले आहे. सोलापूर येथे २९ जून रोजी झालेल्या प्रांताच्या शेवटच्या कार्यक्रमात लायन्स क्लब ऑफ रत्नागिरीला तब्बल २० पारितोषिके मिळाली, तर वर्षभरात एकूण ६८ पुरस्कार पटकावले.
अध्यक्ष गणेश धुरी ‘प्लॅटिनम ॲवॉर्ड’ने सन्मानित
क्लबचे अध्यक्ष एमजेएफ लायन गणेश धुरी यांना ‘प्लॅटिनम ॲवॉर्ड’ देऊन सन्मानित करण्यात आले. तसेच, लिओ श्रेयस रसाळ यांनाही ‘प्लॅटिनम ॲवॉर्ड’ने गौरवण्यात आले. ५२ वर्षांची गौरवशाली परंपरा असलेल्या लायन्स क्लब ऑफ रत्नागिरीने या वर्षी १००० हून अधिक सेवाकार्ये करत एक नवा आदर्श निर्माण केला आहे.
नेतृत्व त्रिकुटाची यशस्वी कामगिरी
जुलै २०२४ मध्ये रत्नागिरीमधील नामवंत व्यावसायिक लायन गणेश धुरी (अध्यक्ष), लायन अमेय विरकर (खजिनदार) आणि लायन विशाल ढोकळे (सचिव) यांनी क्लबची धुरा सांभाळली. त्यांच्या नेतृत्वाखाली या वर्षी प्रथमच निधी संकलनाचे दोन मोठे कार्यक्रम आयोजित करण्यात आले. तसेच, बहुप्रांतीय परिषदेत १४ फाईल्सना पुरस्कार मिळाले, ही एक मोठी उपलब्धी आहे.
विविध सेवाकार्यांची मालिका
या वर्षात लायन्स क्लब ऑफ रत्नागिरीने विविध समाजोपयोगी उपक्रम राबवले:
- थिबा पॉईंट येथे एक कायमस्वरूपी आयलंड (मध्यवर्ती दुभाजक) बांधण्यात आले.
- आंतरराष्ट्रीय संघटनेच्या ८ ग्लोबल कॉजेसनुसार ‘सेवा सप्ताह’ साजरा करत आठ वेगवेगळी सेवाकार्ये केली आणि दररोज एका विषयावर परिपत्रक काढले.
- सर्व ‘डेज टू बी ऑब्जर्व्हड’ आणि माजी प्रांतपाल सन्मान सोहळे विविध सेवाकार्य करत साजरे केले.
- गावातील महिलांना प्रोत्साहन देण्यासाठी भव्य रानभाज्या महोत्सव प्रथमच आयोजित केला, ज्यामुळे त्यांच्या व्यवसायाला चालना मिळाली.
- रोटरी क्लब, उपरी लायन्स क्लब आणि झोनमधील इतर लायन्स क्लबसोबत अनेक संयुक्त सेवाकार्ये केली.
- महिला सक्षमीकरण आणि संरक्षणावर मार्गदर्शनपर व्याख्याने व प्रात्यक्षिके आयोजित केली.
- एका गरीब मधुमेहाच्या रुग्णाला व्हीलचेअर प्रदान केली, ज्यांचा पाय काढण्यात आला होता.
- अंधार असलेल्या घरात एका कुटुंबासाठी कायमस्वरूपी विजेची व्यवस्था केली.
- ३००० हून अधिक वृक्षारोपण केले.
- रत्नागिरी रेल्वे स्थानकाजवळ पावसामुळे अडकलेल्या ८०० हून अधिक प्रवाशांना खिचडी वाटप केले.
- गरजू गरिबांना ‘लायन्स शिधा’ वाटप केले आणि वर्षभर दररोज १० गरिबांना जेवण दिले.
- बंधारा बांधणे, सायक्लेथॉन, मॅरेथॉन, आय ग्लास कलेक्शन बॉक्स बसवणे, शाळांना कपाटे देणे, ग्रामपंचायतींना ॲक्यूचेक मशीन देणे, महिला बचत गटांच्या प्रदर्शनात सेवाकार्य करणे, पर्यावरण विषयक उपक्रम, आय बॉल कलेक्शन आणि विविध कार्यशाळा यांसारखी अनेक समाजोपयोगी कामे केली.
आरोग्य सेवा आणि लिओ क्लबचा सहभाग
लायन्स नेत्र रुग्णालय आणि डायलिसिस सेंटरमार्फत गरजू व गरीब लोकांना मोफत आणि अत्यल्प दरात सुविधा उपलब्ध करून देण्यात आल्या. रत्नागिरीमध्ये प्रथमच आयोजित दिव्यांग मुलांच्या विविध स्पर्धांमध्ये लायन्स क्लब ऑफ रत्नागिरीचा सक्रिय सहभाग होता.
अध्यक्ष गणेश धुरी, सचिव विशाल आणि खजिनदार अमेय यांनी स्पष्ट केले की, हे भरघोस यश संपूर्ण टीम वर्कमुळेच मिळाले आहे. लायन्स सदस्यांनी, देणगीदारांनी, संस्थांनी आणि पत्रकार वर्गाने दिलेल्या सहकार्यामुळेच हे वर्ष यशस्वी ठरले. ज्येष्ठ सदस्यांचे मार्गदर्शनही मोलाचे ठरले.
नव्याने सुरू झालेल्या लिओ क्लबनेही अप्रतिम साथ दिली असून, त्यांनी स्वतंत्रपणे १०० हून अधिक सेवाकार्ये करत प्रांतात आपले नाव उंचावले आहे.
