रत्नागिरी, ता. २४ : रत्नागिरी जिल्हा परिषद आणि पंचायत समिती निवडणुकांसाठी जाहीर झालेल्या प्रभाग रचनेवर रत्नागिरीतील वकील अॅड. अमेय परुळेकर यांनी गंभीर आक्षेप नोंदवला आहे. नवीन प्रभाग रचनेमुळे डॉ. बाबासाहेब आंबेडकरांनी तयार केलेल्या संविधानातील अनुच्छेद १४ मधील समानतेच्या अधिकाराचे उल्लंघन होत असल्याचा दावा परुळेकर यांनी केला आहे. या संदर्भात त्यांनी जिल्हाधिकाऱ्यांना निवेदन दिले आहे.
वारंवार बदलणाऱ्या प्रभाग रचनेवर प्रश्नचिन्ह
अॅड. परुळेकर यांनी आपल्या निवेदनात म्हटले आहे की, फेब्रुवारी २०१७ मध्ये झालेल्या जिल्हा परिषद निवडणुकीसाठी ५५ गटांची प्रभाग रचना होती. त्यानंतर झालेल्या पुनर्रचनेत ६२ जिल्हा परिषद गट करण्यात आले. मात्र, १४ जुलै रोजी जाहीर झालेल्या नवीन प्रभाग रचनेत जिल्हा परिषद गटांची संख्या ६ ने कमी झाली आहे. त्याचप्रमाणे, जिल्ह्यातील पंचायत समितीच्या गणांची संख्या २०१७ मध्ये ११० होती, ती नंतर १२४ करण्यात आली, परंतु आता पुन्हा १२ ने कमी करण्यात आली आहे.
जिल्हा परिषद गट आणि पंचायत समिती गणांसाठी वेगवेगळे आरक्षण लागू होते. १४ जुलै रोजी जाहीर झालेली ही प्रभाग रचना कायम राहिल्यास, आधीच्या रचनेनुसार प्रचार केलेल्या उमेदवारांना आता नव्या रचनेनुसार पुन्हा प्रचार करावा लागेल, ज्यामुळे जुन्या आणि नव्या उमेदवारांमध्ये भेदभाव निर्माण होईल, असा परुळेकर यांचा युक्तिवाद आहे. यामुळे संविधानातील समानतेच्या अधिकाराचे थेट उल्लंघन होईल, असे त्यांनी नमूद केले आहे.
समान संधीच्या मागणीसाठी आग्रही
अॅड. परुळेकर यांच्या मते, वाढलेली लोकसंख्या, आरक्षण आणि न्यायालयाचे निर्णय यामुळे प्रभाग रचना बदलावी लागत असली तरी, जोपर्यंत सर्व प्रवर्गातील उमेदवारांना जिल्हा परिषदेच्या प्रत्येक प्रभाग व गटात समान पद्धतीने निवडणूक लढवण्याची आणि समान प्रचार करण्याची संधी मिळत नाही, तोपर्यंत रत्नागिरी जिल्हा परिषदेची प्रभाग रचना, गट किंवा आरक्षण बदलणे योग्य नाही. असा बदल केल्यास तो भारतीय संविधानातील समानतेच्या अधिकाराचे उल्लंघन ठरेल.
प्रत्येक प्रवर्गाच्या उमेदवाराला समान गट किंवा प्रभागात समान निवडणूक लढवण्याची आणि समान प्रचार करण्याची संधी मिळाल्यानंतरच रत्नागिरी जिल्हा परिषदेची प्रभाग रचना किंवा गट रचना बदलणे योग्य ठरेल, असे परुळेकर यांनी आपल्या निवेदनात म्हटले आहे. या आक्षेपामुळे जिल्हा परिषद निवडणुकीच्या प्रक्रियेत नवे वळण येण्याची शक्यता आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:05 25-07-2025
