रत्नागिरी, [२६ जुलै, २०२५]: रत्नागिरी जिल्ह्याच्या विकासाला आता हवाई गती मिळणार आहे. येथील विमानतळाच्या विस्तारीकरण आणि आधुनिकीकरणाच्या कामांनी प्रचंड वेग घेतला आहे. महाराष्ट्र विमानतळ विकास प्राधिकरणाच्या (MADC) माध्यमातून सुरू असलेल्या या कामांमुळे रत्नागिरीची हवाई कनेक्टिव्हिटी मोठ्या प्रमाणावर सुधारण्यास मदत होणार असून, जिल्ह्याच्या पर्यटन आणि औद्योगिक विकासाला नवी दिशा मिळेल, अशी अपेक्षा व्यक्त होत आहे.
गेल्या काही वर्षांपासून उद्योगमंत्री उदय सामंत यांनी रत्नागिरीतून प्रवासी हवाई वाहतूक सुरू व्हावी, यासाठी सातत्याने प्रयत्न केले आहेत आणि त्यांच्या या प्रयत्नांना आता यश येत आहे. मागील काही महिन्यांपासून विमानतळावरील विकासकामांनी गती घेतली आहे.
आमदार किरण उर्फ भैय्या सामंत यांनीही या कामांकडे विशेष लक्ष दिले आहे. त्यांनी नुकतीच विमानतळाच्या कामांना भेट देऊन अधिकारी व ठेकेदारांशी चर्चा करत कामांचा आढावा घेतला. तसेच, महाराष्ट्र विमानतळ विकास प्राधिकरणाच्या अधिकाऱ्यांसोबत बैठक घेतली. यावेळी प्रांताधिकारी जीवन देसाई व अन्य अधिकारी उपस्थित होते.
विमानतळाच्या प्रगतीपथावरील प्रमुख कामे:
- अत्याधुनिक टर्मिनल इमारत: नवीन टर्मिनल इमारतीचे बांधकाम सध्या २५ टक्के पूर्ण झाले आहे. MADC ने हे काम येत्या एप्रिल २०२६ अखेरपर्यंत पूर्ण करण्याचे महत्त्वाकांक्षी उद्दिष्ट ठेवले आहे. ही इमारत पूर्ण झाल्यावर प्रवाशांना आंतरराष्ट्रीय दर्जाच्या सुविधा मिळतील.
- नेव्हिगेशन प्रणालीसाठी जमीन: विमानतळावर DVOR (Doppler VHF Omni-directional Range) ही आधुनिक नेव्हिगेशन यंत्रणा बसवण्यासाठी ७.२२ हेक्टर जमीन कोस्ट गार्डला लवकरच हस्तांतरित केली जाईल.
- भविष्यासाठी भूसंपादन: कमी दृश्यमानतेतही विमानांना सुरक्षित उतरवता येण्यासाडी आवश्यक असलेल्या इन्स्ट्रुमेंट लँडिंग सिस्टीम (ILS) साठी आणि विमानतळाच्या भविष्यातील वाढीच्या गरजांसाठी आणखी ५ ते ७ हेक्टर जागेचे संपादन करण्यावर चर्चा झाली आहे. सध्या ७ हेक्टर जमिनीच्या संपादनाची प्रक्रिया सुरू आहे.
- टॅक्सी ट्रॅकमुळे सुलभ वाहतूक: विमानतळावरील वाहतूक अधिक सुरळीत करण्यासाठी रस्त्याला समांतर टॅक्सी ट्रॅकच्या बांधकामासाठी निविदा प्रक्रिया सुरू झाली आहे. हा ट्रॅक कार्यान्वित झाल्यावर विमानाची ये-जा अधिक सुरक्षित आणि जलद होईल.
- केबल कामावर लवकरच निर्णय: शहरातून विमानतळापर्यंत केबल टाकण्याचे काम सध्या थांबले आहे. बांधकाम विभाग आणि प्रांताधिकारी यांच्यात यावर लवकरच चर्चा होऊन योग्य निर्णय घेतला जाईल.
या सर्व विकासकामांमुळे रत्नागिरीच्या विकासाला खऱ्या अर्थाने ‘हवाई भरारी’ मिळेल अशी आशा व्यक्त केली जात आहे.
