रत्नागिरी: रत्नागिरी जिल्ह्यातील जयगड परिसरातून एक अत्यंत धक्कादायक आणि खळबळजनक घटना समोर आली आहे. ‘सैतान’ म्हणून ओळखल्या जाणाऱ्या दुर्वास पाटील याच्यावर एकामागोमाग एक तिसऱ्या खुनाचा गुन्हा दाखल झाल्याने संपूर्ण जिल्ह्यात खळबळ उडाली आहे. सुरुवातीला भक्ती मयेकर आणि त्यानंतर राकेश जंगम याच्या हत्येप्रकरणी अटकेत असलेल्या दुर्वास पाटील यानेच सीताराम लक्ष्मण वीर (वय ५५) यांचीही हत्या केल्याचे पोलीस तपासात उघड झाले आहे.
विशेष म्हणजे, सीताराम वीर यांच्या हत्येत दुर्वासचा साथीदार असलेला राकेश जंगम याचाही त्यानेच काटा काढल्याचे स्पष्ट झाल्याने या प्रकरणाला एक वेगळेच आणि क्रूर वळण मिळाले आहे.
काय आहे नेमके प्रकरण?
याप्रकरणी मयत सीताराम वीर यांचे सुपुत्र अमित सिताराम वीर (वय ३२) यांनी जयगड पोलीस ठाण्यात फिर्याद दिली आहे. त्यांच्या फिर्यादीनुसार, त्यांचे वडील सीताराम वीर हे दिनांक २९ एप्रिल २०२४ रोजी सकाळी खंडाळा येथील आरोपी दुर्वास पाटील याच्या मालकीच्या ‘सायली देशी बार’मध्ये दारू पिण्यासाठी गेले होते.
त्यावेळी, “माझी मैत्रीण भक्ती मयेकर हिला तू फोनवर बोलून त्रास देतोस,” असा आरोप करत आरोपी दुर्वास पाटील, त्याचा साथीदार विश्वास पवार आणि राकेश जंगम यांनी संगनमत करून सीताराम वीर यांना हाताने आणि काठीने बेदम मारहाण केली. या मारहाणीनंतर, आरोपी दुर्वास पाटील याने सीताराम यांना चक्कर आल्याचे खोटे कारण सांगितले आणि त्यांना एका रिक्षातून कळझोंडी येथील त्यांच्या घरी पाठवून दिले, जिथे काही वेळातच त्यांचा मृत्यू झाला.
गुन्ह्यांचे चक्रव्यूह आणि धक्कादायक खुलासा
या प्रकरणातील सर्वात धक्कादायक बाब म्हणजे, सीताराम वीर यांच्या हत्येत आरोपी असलेला राकेश अशोक जंगम हा स्वतः दुर्वास पाटीलच्या क्रूरतेचा बळी ठरला आहे. पोलिसांच्या तपासात सुरुवातीला भक्ती मयेकर हिच्या खुनाचा उलगडा झाला. त्यानंतर राकेश जंगम याच्या हत्येचे बिंग फुटले. आता या दोन्ही गुन्ह्यांचा तपास करत असताना, एप्रिल २०२४ मध्ये घडलेल्या सीताराम वीर यांच्या हत्येचा धागाही पोलिसांच्या हाती लागला आहे. राकेश जंगम याने सीताराम वीर यांच्या हत्येत दुर्वासला साथ दिली होती, मात्र नंतर दुर्वासने त्याचाही खून केला.
पोलिसांची कारवाई आणि गुन्हा दाखल
फिर्यादी अमित वीर यांच्या तक्रारीनंतर, जयगड पोलिसांनी दिनांक १ सप्टेंबर २०२५ रोजी रात्री उशिरा याप्रकरणी गुन्हा दाखल केला आहे.
- गुन्हा नोंद क्रमांक: ३७/२०२५
- कलमे: भारतीय दंड विधान कलम ३०२ (खून), २०१ (पुरावा नष्ट करणे), आणि ३४ (समान उद्देशाने कट रचणे)
- आरोपींची नावे:
- दुर्वास दर्शन पाटील (वय २८, रा. वाटद, खंडाळा)
- विश्वास विजय पवार (वय ४१, रा. कळझोंडी बौद्धवाडी)
- राकेश अशोक जंगम (वय २८, रा. खंडाळा कोकणनगर) – (मयत)
एकाच आरोपीने केलेल्या तीन खुनांच्या मालिकेमुळे रत्नागिरी जिल्ह्यात भीतीचे वातावरण पसरले असून, पोलीस या प्रकरणाचा अधिक तपास करत आहेत आणि यातून आणखी काही गुन्हे उघडकीस येण्याची शक्यता वर्तवली जात आहे.
