गुहागर: ऐन विधानसभा निवडणुकीत कोकणातील राजकीय घडामोडींना वेग आला आहे. कोकणात रत्नागिरी जिल्ह्यातील गुहागर विधानसभा मतदारसंघातून भाजपाचे माजी आमदार विनय नातू यांनी जोरदार तयारी केली असताना आता या सगळ्या राजकीय घडामोडीत गुहागर नगरपंचायतीचे माजी नगराध्यक्ष राजेश बेंडल यांच्या नावावरती महायुतीच्या नेत्यांनी शिक्कामोर्तब केल्याची चर्चा आहे. बहुजन समाजातील कुणबी समाजाचा चेहरा असलेले राजेश बेंडल यांना उमेदवारी देण्यासाठी थेट हालचाली सुरू असल्याची सूत्रांची माहिती आहे. यासाठी मुख्यमंत्री एकनाथ शिंदे यांची बेंडल यांनी नेते अशोक वालम यांच्या समवेत रविवारी मध्यरात्री उशिरा भेट घेतल्याची माहिती आहे.
दरम्यान, बेंडल यांची थेट मुख्यमंत्र्यांसोबत झालेली भेट ही स्थानिक पदाधिकाऱ्यांना फरशी रुचलेली नाही, अशीही चर्चा आहे. तेव्हा या भेटीनंतर स्थानिक पदाधिकांमध्ये काहीशी नाराजी गुहागर तालुक्यात असल्याचे वृत्त आहे. तेव्हा या सगळ्या राजकीय घडामोडींच्या पार्श्वभूमीवर आता या सगळ्या विषयात पालकमंत्री व महायुतीच्या नेत्यांना लक्ष घालून स्थानिक पदाधिकाऱ्यांजवळ चर्चा करून या सगळ्या विषयात विश्वासात घेऊनच पुढील निर्णय होण्याची शक्यता आहे.
रत्नागिरी जिल्ह्यातील गुहागर विधानसभा मतदारसंघ भाजपचा पारंपरिक बालेकिल्ला होता. २००९ मध्ये शिवसेनाप्रमुख बाळासाहेब ठाकरे यांनी हा मतदारसंघ भाजपचे तत्कालीन नेते लालकृष्ण अडवाणी यांच्याकडे शब्द टाकत रामदास कदम यांच्यासाठी मागून घेतला होता व या मतदारसंघाच्या बदल्यात भाजपाला अन्य मतदारसंघ सोडण्यात आला होता. तेव्हापासून या मतदारसंघावरती आमदार भास्कर जाधव यांचे एकहाती वर्चस्व आहे. या वेळेला जाधव यांच्यासमोर महायुती कोणत्या चेहऱ्याला या मतदारसंघात उमेदवारीची संधी देणार हे पाहणं महत्वाचं ठरणार आहे.
सहा वर्षांपूर्वी गुहागर नगरपंचायतीत भास्कर जाधव यांच्या विरोधात सर्वपक्षीय असलेली गुहागर शहर विकास आघाडी स्थापन करून विनय नातू, राजेश बेंडल यांच्या पुढाकाराने गुहागर नगरपंचायतीत सत्ता आणण्यात यश आलं होतं. त्यावेळेला राजेश बेंडल हे गुहागर शहर विकास आघाडीकडून थेट नगराध्यक्ष म्हणून निवडून आले होते. ते यापूर्वी गुहागर पंचायत समितीचे माजी सभापती राहिले आहेत. कुणबी समाजाचे असलेले बेंडल हा बहुजन समाजाचा चेहरा गुहागर विधानसभा मतदारसंघात भास्कर जाधव यांच्यासमोर उतरवण्यासाठी शिवसेना भाजप व अजितदादांची राष्ट्रवादी या पक्षाचे तीनही नेते त्यांच्या नावावरती गांभीर्याने विचार करत असून याच नावावर अंतिम शिक्कामोर्तब होण्याची होण्याची शक्यता अधिक असल्याची माहिती सूत्रांनी दिली आहे. महायुतीकडून सोमवारी रात्री उशिरापर्यंत गुहागर विधानसभा मतदारसंघा संदर्भात निर्णय होऊ शकतो.
श्रीकांत शिंदेच्या मेहुण्याचीही चर्चा
गुहागर विधानसभा मतदारसंघातून श्रीकांत शिंदे यांचे मेहुणे विपुल कदम यांच्या नावाचीही चर्चा होती. विपुल कदम यांच्या पाठी श्रीकांत शिंदेंची ताकद आहे. पण, तरी विद्यमान आमदार भास्कर जाधवांना टक्कर देणे सोपं नसेल. विपुल कदम यांनी या संदर्भात कोणती थेट प्रतिक्रिया न देता मी एक सामान्य कार्यकर्ता म्हणून गुहागर मध्ये आलो आहे या सगळ्यांचे निर्णय हा मुख्यमंत्री एकनाथ शिंदे व महायुतीच्या नेत्यांचा यांचा असल्याचा म्हटला आहे.
श्रीकांत शिंदेंचे मेहुणे विपुल कदम या नवीन चेहऱ्याला उमेदवारी मिळावी यासाठी गुहागरचे शिवसेनेचे काही पदाधिकारी यांनी मुख्यमंत्री यांची भेट घेण्यासाठी रविवारी रात्री उशिरा मुंबई येथे गेले होते. मात्र, त्याच दरम्यान राजेश बेंडल व अशोक पालम हेही मुख्यमंत्र्याचे भेटीला वर्षा बंगल्यावर पोहोचल्याने आता नवा ट्विस्ट निर्माण झाला आहे. त्यामुळे आता एकनाथ शिंदे कोणाला येथून उमेदवारी देतात आणि कोणाचा हिरमोड होतो, हे पाहाणं औत्सुक्याचं ठरेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:47 21-10-2024
