संगमेश्वर : जिल्ह्यात घरफोडीच्या घटना वाढत असतानाच, संगमेश्वर तालुक्यातील तळेकांटे, चटकवाडी येथे एका सेवानिवृत्त व्यक्तीच्या बंद गोदामाचे कुलूप तोडून अज्ञात चोरट्याने १७,००० रुपये किमतीचे तीन सबमर्सिबल पाण्याचे पंप लंपास केल्याची घटना उघडकीस आली आहे. ही चोरी ६ सप्टेंबर २०२५ ते १९ सप्टेंबर २०२५ या १३ दिवसांच्या कालावधीत घडली आहे.
याप्रकरणी फिर्यादी शांताराम जयराम पाटोळे (वय ८०) यांनी २५ सप्टेंबर २०२५ रोजी संगमेश्वर पोलीस ठाण्यात तक्रार दाखल केली आहे. पाटोळे, जे सध्या विरार (जि. पालघर) येथे वास्तव्यास आहेत, त्यांचे चटकवाडी येथील घराशेजारील शेतीचे साहित्य ठेवण्याचे गोडाऊन बंद होते. याच संधीचा फायदा घेत अज्ञात चोरट्याने गोदामाच्या दरवाजाचा कोयंडा वाकवून कुलूप काढले आणि आत प्रवेश केला.
चोरट्याने गोदामातून तीन सबमर्सिबल पाण्याचे पंप चोरून नेले. यामध्ये एक २ एचपीचा पंप (किंमत ₹३,०००) आणि किर्लोस्कर कंपनीचे प्रत्येकी ५ एचपीचे दोन पंप (किंमत ₹७,००० प्रत्येकी) असे एकूण १७,००० रुपयांचे साहित्य चोरीस गेले.
या घटनेनंतर पोलिसांनी गु.आर.नं. १११/२०२५ अन्वये भारतीय न्यायसंहिता अधिनियम २०२३ चे कलम ३३१ (३), ३३१ (४) आणि ३०५(अ) प्रमाणे अज्ञात चोरट्याविरोधात घरफोडी चोरीचा गुन्हा दाखल केला आहे. विशेषतः बंद घरे आणि कृषी साहित्याचे गोदावे लक्ष्य करणाऱ्या या चोरट्यांचा शोध घेण्यासाठी संगमेश्वर पोलिसांनी तपास सुरू केला आहे. सेवानिवृत्त व्यक्तीचे झालेले हे नुकसान आणि वाढत्या चोऱ्यांमुळे परिसरातील नागरिकांमध्ये भीतीचे वातावरण आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
04:43 PM 26/Sep/2025
