रत्नागिरी, ३० सप्टेंबर २०२५: पश्चिम महाराष्ट्रातील घाटमाथ्यावर सुरू असलेल्या मुसळधार पावसाचा थेट परिणाम कोकणातील बाजारपेठेवर झाला असून, रत्नागिरीत भाजीपाल्याचे दर अक्षरशः गगनाला भिडले आहेत. कोल्हापूर, सातारा आणि पुणे भागातून येणाऱ्या भाज्यांची आवक घटल्याने सर्वच भाज्यांच्या दरात प्रतिकिलोमागे ३० ते ४० रुपयांची मोठी वाढ झाली आहे. यामुळे सर्वसामान्यांचे, विशेषतः गृहिणींचे महिन्याचे आर्थिक गणित पूर्णपणे विस्कटले आहे.
अतिवृष्टीमुळे पुरवठा साखळी विस्कळीत
रत्नागिरी जिल्ह्याची भाजीपाल्याची मुख्य बाजारपेठ पश्चिम महाराष्ट्रावर अवलंबून आहे. मात्र, गेल्या काही दिवसांपासून त्या भागात सुरू असलेल्या अतिवृष्टीमुळे आणि अनेक ठिकाणी पूरसदृश परिस्थिती निर्माण झाल्याने वाहतुकीवर गंभीर परिणाम झाला आहे. शेतातील मालाचे मोठे नुकसान झाले असून, जो काही माल उपलब्ध आहे तो कोकणापर्यंत पोहोचवणे अवघड झाले आहे. या पुरवठ्याच्या तुटवड्यामुळे दरांमध्ये मोठी वाढ झाली आहे.
मटार दोनशे पार, इतर भाज्यांनीही गाठली शंभरी
बाजारपेठेत जवळपास सर्वच फळभाज्या आणि पालेभाज्या महागल्या आहेत. हिरव्या मटारने तर प्रतिकिलो २०० रुपयांचा टप्पा गाठला आहे, ज्यामुळे तो सर्वसामान्यांच्या ताटातून गायब झाला आहे. इतर भाज्यांची परिस्थितीही फारशी वेगळी नाही.
प्रमुख भाज्यांचे आजचे बाजारभाव:
मटार: ₹ २०० प्रति किलो
शेवग्याच्या शेंगा: ₹ १५० प्रति किलो
गवार: ₹ १२० प्रति किलो
भोपळी मिरची: ₹ १२० प्रति किलो
भेंडी: ₹ १०० प्रति किलो
टोमॅटो: ₹ ४० ते ५० प्रति किलो
मेथीची जुडी: ₹ ३० ते ४० रुपये
याशिवाय भेंडी, गवार, कोबी, पडवळ, दुधी, फ्लॉवर यांसारख्या दैनंदिन गरजेच्या भाज्यांचे दरही सामान्यांच्या आवाक्याबाहेर गेले आहेत. जोपर्यंत पश्चिम महाराष्ट्रातील पावसाचा जोर ओसरत नाही आणि वाहतूक व्यवस्था सुरळीत होत नाही, तोपर्यंत हे दर चढेच राहण्याची शक्यता व्यापाऱ्यांकडून वर्तवली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:29 30-09-2025
