पाली (रत्नागिरी) : आंतरराष्ट्रीय सहकार वर्ष २०२५ (International Year of Cooperatives 2025) आणि ७२ व्या अखिल भारतीय सहकार सप्ताहाचे औचित्य साधून रत्नागिरी जिल्ह्यातील पाली येथे भव्य ‘सहकार दिंडी’ आणि ‘सहकार प्रशिक्षण कार्यशाळे’चे आयोजन करण्यात आले होते.
महाराष्ट्र राज्य सहकारी संघ मर्या. पुणे, रत्नागिरी जिल्हा सहकारी बोर्ड, रत्नागिरी जिल्हा मध्यवर्ती सहकारी बँक (RDCC Bank) आणि जिल्हा उपनिबंधक सहकारी संस्था यांच्या विद्यमाने हा कार्यक्रम १८ नोव्हेंबर २०२५ रोजी डी. जे. सामंत सिनिअर कॉलेज, पाली येथे उत्साहात पार पडला.
या उपक्रमासाठी पाली व परिसरातील तक्षशिला, शिवशाही, रणजीत, राजापूर तालुका कुणबी (शाखा पाली) या पतसंस्थांसह नाणीज, पाली पंचक्रोशी, वेळवंड आणि खानू या विविध कार्यकारी सहकारी सेवा सोसायट्यांचे मोलाचे सहकार्य लाभले.
शिवरायांना अभिवादन आणि भव्य ‘सहकार दिंडी’
कार्यक्रमाची सुरुवात सकाळी १०:३० वाजता पाली येथील छत्रपती शिवाजी महाराजांच्या पुतळ्याला पुष्पहार अर्पण करून करण्यात आली. त्यानंतर छत्रपती शिवाजी महाराज चौक ते डी. जे. सामंत कॉलेजपर्यंत भव्य ‘सहकार दिंडी’ (Sahakar Dindi) काढण्यात आली.
या दिंडीमध्ये मराठा मंदिर ज्युनिअर कॉलेजचे विद्यार्थी, सर्व पतसंस्थांचे पदाधिकारी आणि सहकारी बोर्डाचे पदाधिकारी मोठ्या संख्येने सहभागी झाले होते. विद्यार्थ्यांनी दिलेल्या ‘सहकार घोषवाक्यां’च्या निनादाने परिसर दुमदुमून गेला. अतिशय शिस्तबद्ध पद्धतीने ही दिंडी महाविद्यालयाच्या प्रांगणात पोहोचली.
सहकार ध्वजारोहण आणि दीपप्रज्वलन
डी. जे. सामंत कॉलेजच्या प्रांगणात जिल्हा सहकारी बोर्डाचे उपाध्यक्ष श्री. प्रतापराव सावंत यांच्या हस्ते ‘सहकार ध्वज’ फडकविण्यात आला. त्यानंतर सभागृहात मान्यवरांच्या हस्ते दीपप्रज्वलन आणि राष्ट्रगीताने मुख्य कार्यशाळेला सुरुवात झाली. यावेळी सहकार्य करणाऱ्या सर्व संस्थांच्या पदाधिकाऱ्यांचा शाल व पुष्पगुच्छ देऊन सन्मान करण्यात आले.
मान्यवरांचे मार्गदर्शन : ‘युवकांनी सहकार समजून घ्यावा’
कार्यशाळेत मार्गदर्शन करताना मान्यवरांनी सहकार चळवळीचे महत्त्व विशद केले:
- प्रास्ताविक: जिल्हा सहकारी बोर्डाचे संचालक व तक्षशिला पतसंस्थेचे अध्यक्ष श्री. नितीन कांबळे यांनी प्रास्ताविक करताना, युवा वर्गाला सहकाराचे महत्त्व समजणे काळाची गरज असल्याचे सांगितले.
- बँकिंग आणि सहकार: रत्नागिरी जिल्हा मध्यवर्ती बँकेचे अधिकारी श्री. जाधव आणि श्री. गंगावणे यांनी बँकेच्या विविध योजना आणि सहकाराचे महत्त्व यावर प्रकाश टाकला.
- युवकांसाठी मार्गदर्शन: प्रमुख मार्गदर्शक श्री. चव्हाण सर यांनी युवा वर्गाला सहकाराची जाणीव आणि महत्त्व यावर सविस्तर मार्गदर्शन केले. तसेच महाविद्यालयाच्या प्राचार्य डॉ. श्रीम. कांबळे मॅडम यांनी सहकाराचा इतिहास विद्यार्थ्यांना समजावून सांगितला. जिल्हा मजूर संघाचे अध्यक्ष विनायक शिवगण यांनीही यावेळी उपस्थितांना मार्गदर्शन केले.
मान्यवरांची उपस्थिती
या कार्यक्रमाला रत्नागिरी जिल्हा सहकारी बोर्डाचे उपाध्यक्ष श्री. प्रतापराव सावंत, संचालक रामचंद्र (रामभाऊ) गराटे, तक्षशिला पतसंस्थेचे अध्यक्ष नितीन कांबळे, उपाध्यक्ष अमोल सावंत, शिवशाही पतसंस्थेचे अध्यक्ष दिनेश सावंत, रणजीत पतसंस्थेचे संचालक श्री. कोलते, नाणीज सेवा सोसायटीचे चेअरमन प्रकाश कांबळे, पाली सेवा सोसायटीचे चेअरमन चंद्रशेखर सुर्वे, वेळवंड सोसायटीचे माजी संचालक नारायण मोहिते, खानू सोसायटीचे चेअरमन संभाजी सुवारे, राजापूर कुणबी पतपेढीचे व्यवस्थापक प्रकाश भाबळे, पाली उपसरपंच संतोष धाडवे यांसह विविध संस्थांचे पदाधिकारी, मराठा मंदिरचे प्राध्यापक आणि विद्यार्थी मोठ्या संख्येने उपस्थित होते. सदर कार्यशाळेत सहभागी संस्थांना रत्नागिरी जिल्हा सहकारी बोर्डातर्फे प्रमाणपत्र प्रदान करण्यात आले. कार्यक्रमाचे सूत्रसंचालन प्रा. अमोल यादव यांनी केले, तर आभार तक्षशिलाचे उपाध्यक्ष अमोल सावंत यांनी मानले.
