देवरुख : शहरातील एस.टी. स्टॅण्डवर प्रवाशांच्या गर्दीचा फायदा घेत अज्ञात चोरट्याने ६५ वर्षीय वृद्ध महिलेच्या गळ्यातील सुमारे ५० हजार रुपये किमतीची सोन्याची बोरमाळ चोरून नेल्याची धक्कादायक घटना रविवारी दुपारी घडली आहे. या प्रकरणी देवरुख पोलिस ठाण्यात गुन्हा दाखल करण्यात आला असून, अज्ञात चोरट्याचा शोध सुरू आहे. सावित्री सखाराम कुराडे (६५, रा. बामणोली, मावळतीवाडी, ता. संगमेश्वर) या महिलेने या चोरीची फिर्याद दिली आहे.
रविवारी दुपारी १२ वाजण्याच्या सुमारास त्या देवरुख येथील एस.टी. स्टॅण्डवर होत्या. त्यांना बामणोली येथे जायचे होते, परंतु त्या कुंडी बेलारीकडे जाणाऱ्या बसमध्ये चुकून चढू लागल्या. फिर्यादी बसमध्ये चढत असताना त्यांना ती बस वामणोली येथे जात नसल्याचे लक्षात आले. त्याचवेळी बसमध्ये प्रवाशांची मोठी गर्दी होती. बसमधून उतरण्याच्या गडबडीत किंवा गर्दीत ढकलाढकली होत असताना त्यांच्या बोरमाळेला लावलेली सेफ्टी पिन खाली पडली. याच गर्दीचा फायदा घेऊन अज्ञात चोरट्याने फिर्यादीच्या गळ्यातील सोन्याची बोरमाळ (४० बारीक मणी असलेली, वजन १२.५ ग्रॅम) चोरून नेली. हा प्रकार लक्षात येताच त्यांनी तात्काळ पोलिसांशी संपर्क साधला. घटनेची नोंद देवरुख पोलीस ठाण्यात करण्यात आली आहे. पोलिसांनी भारतीय दंड संहितेच्या कलम ३०३ (२) अंतर्गत एम. आर. क्र. १३२/२०२५ नुसार अज्ञात चोरट्याविरुद्ध चोरीचा गुन्हा दाखल केला आहे. देवरुख एस.टी. स्टॅण्डसारख्या सार्वजनिक ठिकाणी भरदिवसा झालेल्या या चोरीमुळे प्रवाशांमध्ये भीतीचे वातावरण निर्माण झाले असून, पोलिस या अज्ञात चोरट्याचा कसून शोध घेत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:32 AM 19/Nov/2025
