रत्नागिरी: सिंधुदुर्गमध्ये उद्धव बाळासाहेब ठाकरे गटाचे आमदार वैभव नाईक यांनी मुख्यमंत्री एकनाथ शिंदे यांच्या हेलिकॉप्टरमधील बॅगांबाबत केलेल्या आरोपांवरून राजकारण तापले आहे. यावर आता राज्याचे उद्योगमंत्री आणि रत्नागिरीचे पालकमंत्री उदय सामंत यांनी जोरदार प्रत्युत्तर दिले आहे. “शिंदे साहेब सलग ८-८ दिवस दौऱ्यावर असतात, त्यांच्या बॅगेत कपडे होते. वैभव नाईकांचे आरोप बालिश असून केवळ नैराश्यातून त्यांनी हे वक्तव्य केले आहे,” असा टोला सामंत यांनी लगावला आहे.
रत्नागिरीत आयोजित पत्रकार परिषदेत उदय सामंत यांनी वैभव नाईक यांचा समाचार घेतानाच देवगडमधील रोकड प्रकरण आणि निवडणूक आयोगाचा कारभार यावरही भाष्य केले.
नेमके काय म्हणाले उदय सामंत?
१. कपड्यांच्या बॅगांवरून ‘बालिश’ राजकारण: वैभव नाईक यांनी मुख्यमंत्री एकनाथ शिंदे यांच्या बॅगांमध्ये पैसे असल्याचा आरोप केला होता. याला उत्तर देताना सामंत म्हणाले, “वैभव नाईकांनी एक मोठा ‘शोध’ लावला आहे, पण त्यांच्या या आरोपात काहीच तथ्य नाही. मुख्यमंत्री एकनाथ शिंदे हे सलग आठ दिवस घरी न जाता राज्यभर प्रचार करत आहेत. अशा वेळी कपड्यांच्या बॅगा सोबत असणे स्वाभाविक आहे. जे नेते केवळ दोन तासांच्या पर्यटनासाठी येतात, त्यांना हे समजणार नाही. वैभव नाईक हे केवळ आपल्या पक्षप्रमुखांना खुश करण्यासाठी आणि स्वतःचे अस्तित्व टिकवण्यासाठी असे बालिश आरोप करत आहेत.”
२. नैसर्गिक आपत्तीतील मदतीची आठवण: जुन्या आठवणींना उजाळा देताना सामंत म्हणाले की, “जेव्हा सिंधुदुर्गावर नैसर्गिक आपत्ती आली होती, तेव्हा याच एकनाथ शिंदे यांनी वैभव नाईक यांच्या मतदारसंघातील घरांना छत मिळवून दिले होते. नाईकांचे राजकीय व्यक्तिमत्व टिकून राहावे म्हणून शिंदेंनी मदत केली होती. ज्या नेत्याने वाईट काळात मदत केली, त्यांच्यावर असे हीन दर्जाचे आरोप करणे हे राजकीय अपरिपक्वतेचे लक्षण आहे. हे कोकणाचे दुर्दैव आहे.”
३. देवगडमधील रोकड प्रकरण आणि पोलिसांना इशारा: देवगड-मालवणमध्ये सापडलेल्या रोकड प्रकरणावर बोलताना सामंत यांनी स्पष्ट भूमिका मांडली. “रात्री एक वाजता निलेश राणे यांच्या कार्यकर्त्यांनी ही रोकड पकडली. ती गाडी आणि पैसे जप्त करण्यात आले आहेत. आमचे सरकार राज्यात आणि केंद्रात असले तरी चुकीच्या गोष्टीला पाठीशी घालू नका. महाराष्ट्राचे पोलीस स्वाभिमानी आहेत, त्यांनी कोणाच्याही दबावाला बळी न पडता कारवाई करावी,” अशी मागणी त्यांनी केली.
४. निवडणूक आयोगाच्या कारभारावर प्रश्नचिन्ह: निवडणूक प्रक्रियेतील बदलांवर सामंत यांनी आश्चर्य व्यक्त केले. “निवडणूक आयोगाचा निर्णय आणि त्यानंतर कोर्टाने दिलेले आदेश यामुळे संभ्रम निर्माण झाला आहे. जे फॉर्म आधी बाद ठरले होते, ते पुन्हा वैध कसे झाले? तसेच मतमोजणी पुढे ढकलल्याने नक्की काय साध्य होणार आहे, हे अनाकलनीय आहे. देवेंद्र फडणवीस यांनीही याबाबत शंका उपस्थित केली आहे,” असे सामंत म्हणाले.
५. महायुतीत कुरबुरी नाही: भाजप आक्रमक झाली आहे का, या प्रश्नावर उत्तर देताना सामंत यांनी महायुतीत सर्व आलबेल असल्याचे सांगितले. “नेते एकमेकांच्या प्रचाराला जात आहेत. खालच्या फळीतील कार्यकर्त्यांनीही महायुतीचा धर्म पाळला पाहिजे, अशा सूचना देण्यात आल्या आहेत,” असे त्यांनी स्पष्ट केले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:12 AM 03/Dec/2025
