राजापूर (रत्नागिरी): राजापूर तालुक्यातील गोठिवरे (पो. बुरंबे) येथे एका बंद घराला लक्ष्य करत अज्ञात चोरट्यांनी घरफोडी केल्याची घटना समोर आली आहे. विशेष म्हणजे चोरट्यांनी दरवाजा तोडण्याऐवजी कडी-कोयंड्याचे स्क्रू पाना (Spanner) वापरून शिताफीने काढले आणि घरात प्रवेश केला. याप्रकरणी नाटे पोलीस ठाण्यात गुन्हा दाखल करण्यात आला आहे.
नेमकी घटना काय?
फिर्यादी सौ. रसिका रविंद्र रासम (वय ५७, व्यवसाय – गृहिणी) या मूळच्या गोठिवरे, राजापूर येथील रहिवासी असून त्या सध्या डोंबिवली पूर्व (खोनी पलावा) येथे वास्तव्यास आहेत. त्यांचे गोठिवरे येथील घर दि. ०९/१२/२०२५ रोजी सकाळी १०.०० वाजता बंद करण्यात आले होते. त्यानंतर दि. २१/१२/२०२५ रोजी सकाळी १०.०० वाजेपर्यंतच्या कालावधीत ही चोरीची घटना घडली.
फिर्यादी या गावी आल्यानंतर त्यांना घराच्या दरवाजाच्या कडी-कोयंड्याचे स्क्रू काढलेले दिसले. चोरट्यांनी हे स्क्रू काढण्यासाठी वापरलेला पाना (Spanner) घराबाहेर असलेल्या बेसिनमध्ये ठेवून दिल्याचे आढळून आले.
असा आहे चोरीला गेलेला मुद्देमाल : चोरट्यांनी घरात प्रवेश करून खालील साहित्य लंपास केले: १) झाडे कापण्याच्या ‘स्टिल एम एस’ (Stihl MS) कंपनीच्या मशीनचे ब्लेड (किंमत १,००० रुपये). २) याच मशीनची चैन (किंमत १,००० रुपये). ३) स्वयंपाकाची विविध भांडी (किंमत १,००० रुपये). असा एकूण ३,००० रुपयांचा मुद्देमाल चोरीला गेला आहे.
पोलीस तपास सुरू : या प्रकरणी सौ. रसिका रासम यांनी दिलेल्या फिर्यादीवरून नाटे पोलीस ठाण्यात (राजापूर) भारतीय न्यायसंहिता अधिनियम २०२३ (BNS) चे कलम ३०५ (८), ३३१ (३) आणि ३३१ (४) अन्वये गुन्हा दाखल करण्यात आला आहे (गुन्हा रजिस्टर नंबर १००/२०२५).
ही घटना दि. २२/१२/२०२५ रोजी सायंकाळी उघडकीस आली असून, अज्ञात चोरट्यांविरुद्ध गुन्हा नोंदवण्यात आला आहे. या घटनेमुळे परिसरात पुन्हा एकदा बंद घरे असुरक्षित असल्याची चर्चा सुरू झाली आहे. पोलीस या प्रकरणाचा अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:28 23-12-2025
