◼️ राज्याच्या नवनिर्वाचित नगराध्यक्षांचा मुंबईत मेळावा; ना. उदय सामंत आणि दादा भुसे यांची प्रमुख उपस्थिती
मुंबई/रत्नागिरी : रत्नागिरी नगरपरिषदेच्या नगराध्यक्षपदी प्रचंड बहुमताने निवडून आलेल्या नूतन नगराध्यक्षा सौ. शिल्पाताई सुर्वे यांनी काल मुंबईत दादर येथील शिवाजी पार्क (शिवतीर्थ) येथे जाऊन हिंदूहृदयसम्राट बाळासाहेब ठाकरे यांच्या स्मृती स्थळाचे दर्शन घेतले. लवकरच त्या आपल्या पदाचा पदभार स्वीकारणार असून, त्यापूर्वी त्यांनी शिवतीर्थावर नतमस्तक होत वंदन केले.
दिग्गज नेत्यांच्या उपस्थितीत अभिवादन
यावेळी बाळासाहेबांच्या स्मृती स्थळावर दर्शनासाठी रत्नागिरीचे पालकमंत्री तथा उद्योगमंत्री ना. उदय सामंत, कॅबिनेट मंत्री दादा भुसे, माजी आमदार राजन साळवी, पप्पूशेठ सुर्वे, लांजा नगरपंचायतीच्या नूतन नगराध्यक्षा सावली कुरूप, राजू कुरूप आदी मान्यवर उपस्थित होते. सर्वांनी बाळासाहेबांच्या स्मृतीस विनम्र अभिवादन केले.
उपमुख्यमंत्री एकनाथ शिंदे यांची भेट
तत्पूर्वी, काल राज्यभरातून निवडून आलेल्या शिवसेनेच्या सर्व नूतन नगराध्यक्षांनी राज्याचे उपमुख्यमंत्री ना. एकनाथ शिंदे यांची सदिच्छा भेट घेतली. या भेटीदरम्यान उपमुख्यमंत्री शिंदे यांनी शिल्पाताई सुर्वे आणि इतर विजयी उमेदवारांचे अभिनंदन केले आणि पुढील वाटचालीस शुभेच्छा दिल्या. यावेळी मंत्री उदय सामंत हे देखील विशेष उपस्थित होते.
लवकरच स्वीकारणार पदभार
बाळासाहेबांचे आशीर्वाद घेऊन आणि पक्षाच्या वरिष्ठ नेत्यांच्या भेटीगाठी झाल्यानंतर आता रत्नागिरीच्या नगराध्यक्षा शिल्पा सुर्वे लवकरच रत्नागिरी नगरपरिषदेचा कार्यभार अधिकृतपणे स्वीकारणार आहेत. रत्नागिरी शहराचा कायापालट करण्यासाठी आणि विकासकामे गतीने पुढे नेण्यासाठी त्या सज्ज झाल्या आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:22 24-12-2025
