◼️ वेरळ सर्व्हिस रोडवर गाडी तपासताना घडला प्रकार; ट्रकच्या काचा फोडल्या आणि पोलिसांसमोर मारण्याची दिली धमकी
खेड/रत्नागिरी : रत्नागिरी जिल्ह्यातील खेड (Khed) तालुक्यात महामार्गालगत गुंडगिरीचे प्रकार वाढताना दिसत आहेत. वेरळ (Veral) येथील सर्व्हिस रोडवर गाडी थांबवून तपासणी करत असताना, चिपळूणच्या एका ट्रान्सपोर्ट व्यावसायिकाला दोघांनी लोखंडी रॉडने बेदम मारहाण केल्याची घटना समोर आली आहे. “तुम्ही आम्हाला गाडीखाली मारले असते,” असे म्हणत आरोपींनी केवळ मारहाणच केली नाही, तर ट्रकच्या काचा फोडून नुकसान केले. ही घटना रविवारी (दि. २९) मध्यरात्री १२.३० वाजता घडली.
नेमकी घटना काय?
पोलिसांनी दिलेल्या माहितीनुसार, फिर्यादी सोहम किशोर मयेकर (वय २६, व्यवसाय- ट्रान्सपोर्ट, रा. चिवेली, करंबेळीवाडी, ता. चिपळूण) आणि त्यांचे भाऊ ओंकार किशोर मयेकर हे आपल्या वाहनाने जात होते. मध्यरात्री १२.३० च्या सुमारास खेडमधील वेरळ येथे सर्व्हिस रोडवर त्यांनी आपली गाडी उभी केली आणि खाली उतरून गाडी चेक करू लागले.
त्यावेळी आरोपी शुभम संतोष जाधव (वय २७, रा. भरणेनाका, खेड) आणि ऋत्विक उत्तम चव्हाण (वय २३, रा. सवेणी, कातळ माळ, खेड) हे तिथे आले. त्यांनी सोहम आणि त्यांच्या भावाला, “तुम्ही आम्हाला गाडीखाली मारले असते,” असे म्हणत वाद घालण्यास सुरुवात केली.
रॉडने मारहाण आणि धमकी वाद वाढल्यावर आरोपींनी शिविगाळ करत सोहम मयेकर यांच्या हातावर आणि पायावर लोखंडी रॉडने मारहाण करून त्यांना जखमी केले. तसेच तिथे उपस्थित असलेले किशोर मयेकर व विक्रम खांडेकर यांनाही धमकावले. आरोपींचा राग एवढ्यावरच शांत झाला नाही, तर त्यांनी हातातील रॉडने फिर्यादींच्या ट्रकच्या काचा फोडून नुकसान केले. “तुम्हाला पोलिसांसमोर सुद्धा मारू,” अशी उघड धमकी देत आरोपींनी दहशत माजवली.
पोलिसांत गुन्हा दाखल
याप्रकरणी सोहम मयेकर यांनी खेड पोलीस ठाण्यात तक्रार दाखल केली. त्यानुसार पोलिसांनी दोन्ही आरोपींविरोधात भारतीय न्यायसंहिता (BNS) २०२३ चे कलम ११८(१) (स्वेच्छेने दुखापत करणे), ३५२ (शांतता भंग करणे), ३५१(२) (गुन्हेगारी धमकी), ३२४(२) (नुकसान करणे) आणि ३(५) (संगनमत) अन्वये गुन्हा दाखल केला आहे (गुन्हा रजिस्टर नंबर ३९२/२०२५). मध्यरात्री महामार्गावर घडलेल्या या प्रकारामुळे वाहनचालकांमध्ये भीतीचे वातावरण निर्माण झाले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:31 30-12-2025
